Martha Lund Olsen: IA-rmiut kukkupput

Inuit Ataqatigiit Inatsisartuni ilaasortaatitaasa marluk, Juliane Henningsenip aamma Aaja Chemnitz Larsenip, Naalakkersuisut siulittaasuat, Siumumeersoq Kim Kielsen, marlunngornermi aammaarlutik kaammattorpaat peqqissutsimut naalakkersuisumik nutaamik ivertitsinissaanut, Doris Jakobsenip Naalakkersuisunit Folketingimut qinersisoqarnissaata tungaanut sulinngiffeqarnerani.

Taakkua marluk oqarnerat naapertorlugu Inuit Ataqatigiit Inatsisartuni ilaqutariinnermut peqqissutsimullu ataatsimiisitaliaq peqatigalugu peqqissutsimut naalakkersuisuungallartoq, Siumumeersoq Martha Lund Olsen ataatsimeeqatiginiartarsimagaluarpaat, iluatsinngittumilli.

Maanna peqqissutsimut naalakkersuisuungallartoq, Siumumeersoq Martha Lund Olsen, suliassaqarfinnik tulleriiaarinini pillugu Inatsisartuni ilaasortat taakku marluk uparuaateqartut akissuteqarfigai.

- Isumaqarpunga Aaja Chemnitz Larsen aamma Juliane Henningsen oqaramik peqqinnissaqarfik tunulliukkiga kukkusut, allatut ajornartumik Ilaqutariinnermut Peqqissutsimullu ataatsimiititaliamik paasissutissiillunga ataatsimeeqateqarnissara allanngortariaqarsimagakku, uangami nammineq ataatsimiititaliamik qaaqqusisuusimavunga, Martha Lund Olsen oqarpoq.

Atuaruk: IA Kim Kielsenimut: Peqqissutsimut naalakkersuisumik ivertitsigit

Imalu nangippoq:

- Taamatut ataasiarlunga ataatsimiinnermik kinguartitsisariaqarsimanera peqquteqarpoq inuttut namminermut tunngasumik allanngortinneqarsinnaanngitsumik suliassaqarama, kiisalu pinasuartumik isumasioqatigiinnissaq pillugu aningaasaqarnermut ataatsimiititaliamut qaaqquneqarsimagama.

Martha Lund Olsenip aamma naqissuserpaa ilaqutariinnermut peqqissutsimullu ataatsimiisitaliami ilaasortat arlallit aamma aningaasaqarnermut ataatsimiisitaliami ilaasortaasut, ‘taamaasillutillu paasissutissiillunga ataatsimiisitsinissaraluara peqataaffigisinnaanagu’.

- Paasissutissiillunga ataatsimiisitsinissara tallimanngorpat pissaaq, Martha Lund Olsen oqarpoq.