Martha Lund Olsen: Arnat nunatsinni inissisimalluarput

- Arnat Nunatsinni naligiissitaanermut tunngatillugu inissisimalluarput. Ilinniagaqartarput suliffeqarlutillu, naalakkersuinermi, inuussutissarsiornermi kultureqarnermilu peqataatitaqarluarput, sulilu angerlarsimaffinni sulinerup ilarujussuanik isumaginnittuullutik. Nunatsinni inuiaqatigiinni angutit arnallu tamarmik inissaqartinneqarnerat pitsaasuuvoq. Tamatumani paasinarsisinneqarpoq suiaassuseq apeqqutaatinnagu inuiaqatigiinni nutaaliaasuni tamanut inissaqartitsiviusuni inuusugut" Naligiissitaanermut Naalakkersuisoq Martha Lund Olsen, sapaatiuppat marsip ulluisa arfineq pingajuanni arnat ulluannik nalliussinissatsinnut atatillugu Tusagassiivimmut oqarpoq.

Danmarkimi arnat folketingimut qinersinermi taasisinnaatitaalernerannit ukiut 100-nngornerat nalliussineqarpoq. Nunatsinnili arnat taasisinnaatitaalernerannit ukiut taama amerlatiginngillat.

Nunatsinni arnat aatsaat 1948-mi taasisinnaatitaalerput. Taamaalilluni danskit arnartaasa taasisinnaatitaalernerannit ukiut 30-t qaangiunneranni aatsaat Nunatsinni arnat taamatulli taasisinnaatitaalerput. Oqartussaaqataanikkut naligiissitaaneq, ilaatigut arnat angutillu oqartussaaqataaffiusuni naligiinnerusumik peqataatitaqalernerannik kinguneqartoq.

Naak sivikinnerusumik taasisinnaatitaasimagaluarlutik angutitulli angusaqarsinnaanertik kalaallit arnartaasa takutissimavaat, pineqartullu ilaanni ilaatigut ilinniartitaanikkut angutit qaangersimallugit.

Taamaattorli pineqartut ilaanni naligiissitaanerup suli sorsuutigineqartariaqarnera eqqaamassallugu pingaaruteqarpoq. Martha Lund Olsen oqarpoq.

- Aammali unammilligassaqarpoq. Niviarsiaqqanut arnanullu nakuusernerit kinguaassiuutitigullu innarliinerit amerlavallaaqaat. Tamanna akuersaarneqarsinnaanngilaq ilaatigullu nakuuserneq akiorniarlugu 2014-2017-imut iliuusissatut periusissatullu pilersaaruterput aqqutigalugu tamanna unitsinniarsaraarput, naalakkersuisoq oqarpoq, nangillunilu:

- Taamaattumik 8. marts inuiaqatigiinni unammilligassatta saannissaannut pissutissaalluarput.

Nunani tamalaani arnat ulluat, taaneqarneratut nunarsuaq tamakkerlugu nalliussineqartarpoq.