ataatsimeersuarneq
Martha ataatsimeersuaqatiminut: Assigiimmik tamatta suliniuteqarpugut
Naalakkersuisup ICC-ip aqqaneq aappassaanik ataatsimeersuarnerani peqataanermi paquminartut eqqartorumaneqanngitsut oqaluuserai
Kinguaassiutitigut atornerluisarnerit, annersaasarnerit, sunniutit, suliniutit, ilaqutariit angerlarsimaffii imminullu toquttarneq.
Ilaqutariinnermut inatsisinullu atuutsitinermut naalakkersuisup Martha Lund Olsenip Siumumeersup ICC-ip ataatsimeersuarnerani panelemi nunat ICC-ip ilaasortaaffigisaaneersunit saqqummeeqateqarpoq. Tamakku 'Inuiaqatigiit peqqissut Ilaqutariit ilorrisimaartut' pillugit oqallinnermi sammineqarput.
Issittumi nunat assigiimmik ajornartorsiuteqartut tusagassiutinut nalunaarummi Martha Lund Olsen oqarpoq:
- Nuannaarutigeqaara nunani issittormioqatitsinnut Nunatsinni isumaginninnikkut ajornar-torsiutivut ilaqutariinnilu ajornartorsiutit pillugit saqqummisinnaagama. Issittumi najugaqartuusugut inuiaqatigiit eqqarsaatigalugit assigiinnik ajornartorsiuteqarpugut soorlu persuttaasarnerit, kinguaassiuutitigut atornerluisarnerit, imminortarnerit, sumiginnaanerit inuillu misigisapiluminnik kingunerlutsitsisartut eqqarsaatigalugit.
- Immitsinnut saqqummeeqaatigiiffiginerput nunat issittumiittut akimorlugit iluaqutigissagigut qularutiginngilara. Sullissinitsinni tamatta immikkut periusissiaqarpugut assigiinngitsunillu sullisseriaaseqarluta, suleqatigiissutissaqarutta suleqatigiissaagut, ataatsimiinneq pillugu Martha Lund Olsen oqarpoq.
Oqallittoqarluarsimasoq Martha Lund Olsenimit oqaatigineqarpoq.
ICC-imi Inuvimmi ataatsimeersuarnera ataasinngornermit sisamanngorneq ilanngullugu ataatsimeersuartoqassaaq.