qinigaaffiit marluk
Marlunnik qinigaaffeqarneq pillugu Aaja allatut isumaqalertoq
IA-mi politikeri Aaja Chemnitz Larsenip politikerit oqariariartaasiannik oqarsinnaasunut ilannguppoq, tassa: ''nutaamik isumataarnissap tungaanut isumaqartoqartarpoq''.
Aaja Chemnitz Larsenip Inatsisartuni sulinngiffeqarnini taamaatillugu Ane Hansenip inigisaa tiguniaraa partii ippassaq nalunaaruteqarpoq, taassuma avannaani kommunimi nutaami borgmesterinngornini aallunniarmagu.
Marlunnik qinigaaffilik
Aaja Chemnitz Larsen Folketingimut ilaasortaavoq, taamaammallu marlunnik qinigaaffeqassaaq.
Juunip qulingiluaanni 2015-imi Sermitsiaq.AG-mit apersorneqarpoq, taamanikkullu apeqqut una akissuteqarfigaa:
Folketingimut qinigaassaguit Inatsisartuni sulinngiffeqarnissamut qinnuteqassavit? (Aap imaluunniit naagga), marlunnik qinigaaffigillit aamma qanoq isumaqarfigaagit? (Inatsisartunut ilaasortanut qineqqusaartunut apeqqut)
- Aap, sulinngiffeqarnissaq qinnuteqarfigissavara. Qinigaaffiit tamarmik immikkut pingaaruteqarput, ataatsikkullu suliarinissaat illersorneqarsinnaanngilaq.
Aatsaat siullermeerluni politikerimik nutaamik isumataartoqanngilaq.
Kraghip oqaasii
1966-imi Danarmik ministeriuneq Jens Otto Kragh Ekstra Bladetimut Socialdemokratietip aamma Socialistisk Folkepartip suleqatigiinnerat pillugu isummani taama sukkatigisumik allanngortissinnaanera apersorneqarpoq. Qinersineq sioqqullugu Kraghip SF-imik suleqateqarniannginnerarpoq, tassanilu Kraghip oqaasii tusaamasat oqaatigineqarput: ''nutaamik isumataarnissap tungaanut isumaqartoqartarpoq''.
Aaja Chemnitz Larsenip Inatsisartunut ilaasortanngornera partiip siulittaasuanit Sara Olsvigimit ima tunngavilersorneqarput:
- Aaja Chemnitz Larsenip Inatsisartuni suleqataaqqilernera Ane Hansenip tunuarneranut attuumassuteqanngilaq. Sulinngiffeqarnerminik atorunnaarsitsinini nammineq aalajangerpaa.
Borgmesterit marlunnik qinigaaffeqarsinnaanngitsut
Borgmesterit marlunnik qinigaaffeqarsinnaannginnerannik suli isummersuuteqarluni, Sara Olsvigip ilisimatitsissutigaa.