Marc Fussing Rosbach filmiliornermini nersornaaserneqartoq
Nuuk International Film Festivalimi inuusuttoq arlalinnik piginnaasaqartoq, Marc Fussing Rosbach, Nunatsinni filmiliortartut nersornaataat Innersuaq pissarsiaraa. Canadamiup ilitsersuisup 86-nik ukiullip ataqqinaammik nersornaat pissarsiaraa.
Inuusuttup ilitsersuisup Marc Fussing Rosbachip, Nuuk International Film Festivalip naggataarnersiorneqarnerani filmiliortunut nersornaat Innersuaq 2017 pissarsiaraa. Nersornaat FILM.gl-imit tunniunneqartarpoq.
Taassuma filmiliaa 'Akornatsinniittut - Tarratta Nunaanni’ siorna festivalimi takuteqqaarneqarpoq. Marc Fussing Rosbachip filmiliamut atatillugu suna tamangajaat suliaraa. Ilitsersuinerup saniatigut manuskripti nammineq allappaa, nipilersuusiorlugu, katiterlugu, special-effectilersorlugu aamma nammineq peqataaffigalugu. Tamannalu pillugu nersornaaserneqarpoq.
Taanna suliniummik maanna aallartitsereersimavoq.
Ilitsersuisoq 86-nik ukiulik Alanis Obomsawin Canadamiu, ukiormanna ataqqinaammik nersornaasiunneqartoq pissarsiaraa. Festivaalertoqarnerani taassuma filmi ‘The People of the Kattawapiskak River’ aamma ‘Our People Will Be Healed’ takutippai, taamatullu aamma sulinini pillugu oqaluttuarluni. Alanis Obomsawin tupinnaannartumik 50-it sinnerlugit filmiliorsimavoq. Ukioqqortusigaluarlunilu uninnissani pilersaarutiginngilaa.
