Monday, March 20, 2017 - 10:59

Maqiterivik sodavandinik immiaaqqanillu amerlanerusunik tunisaqartoq

Assi.: Leiff Josefsen
Maqiterivik Nuuk Imeq ukiumi qaangiuttumi sodavandinik immiaaqqanillu amerlanerujussuarnik ukiup siulianut sanilliullugu tunisaqarpoq.

Maqiteriviup naatsorsuutaani tamanna takuneqarsinnaavoq, taanna suliffeqarfiup marsip 15-anni ileqquusumik ataatsimeersuarnerani suliarineqarpoq.

Angusat siuariartut
Ukiumi naatsorsuutitigut angusat akileraareernermi 30,3 millionit koruuniupput, tamannalu ukiumut siulianut 2015-imut sanilliullugu 10,5 millionit koruuninik siuariarneruvoq. Kaaviiaartitat 4,6 procentimik qaffariarput, 193 millionit koruuninngorlutik.

Tunisassiat eqqarsaatigalugit sodavandinik tunisineq 6,5 procentimik qaffariarpoq immiaaqqanillu tunisineq 2,8 procentimik qaffariarluni, maqiteriviup tusagassiuutinut nalunaarutaani tamanna atuarneqarsinnaavoq.

Maqiteriviup tusagssiuutinut nalunaarummini suliffeqarfiup matunissaanik ulorianartorsiornera sammineruaa, Namminersorlutik Oqartussat imeruersaatit puui pillugit inatsisit allanngorniarnerat pissutigalugu, taamaalilluni qillertuusat aamma puut ataasiaannartakkat atorneqarsinnaalissallutik.

2018-ip naanerani matusinissaq
Taamatut aalajangernerup Grønlandskonsortiets I/S-ip suliffeqarfiup 2018-ip naanerani matunissaanik aalajangerneq kinguneqartippaa, puunut systemip nutaap maanna systemimut atorsinnaannginnera pissutigalugu.

- Ataatsimeersuarnermi piginnittut oqaatigaat, imeruersaatit puui pillugit nalunaarummik ammanerulersitsinsisaq pillugu Nammersorlutik Oqartussat piffissarititaat paasiniarlugu sulineq annertusisinneqassasoq. Tamassuma aamma kinguneraa 2018-ip naanerani matusinissaq pillugu Grønlandskonsortiep inassuteqaateqarnera periarfissat tamaasa atorneqareersimatinnagit piginnittut akuerisinnaanngikkaat. Piginnittuttaaq sulisut ullut tamaasa suliffissaarunnissamik nalorninartorsiortinneqartartut paasilluarsinnaanerapaat, tusagssiuutinut nalunaarummi ilisimatitsissutigineqarpoq.

Aamma atuaruk: Nuuk Imeq matuneqarnissamut innersuussutigineqartoq

- Aammattaaq piginnittut isumaqatigaat imeruersaatit puui pillugit inatsisip paasisaqarfiginissaa Nuuk Imiup ingerlatsiinnarnissaanut pingaaruteqarluinnartoq – minnerunngitsumik maskiinamik errortuummik nutaamik aningaasaliinissamik maannakkorpiaq pisariaqartitsineq eqqartorneqartillugu. Aningaasaliisoqanngippat ingerlatsineq annertuumik uneqattaariaannaavoq, imaasinnaallunilu piffissami sivisuumi tunisassiunneq unittariaqartassasoq, pilersuisinnaassseqanngitsumik kinguneqartumik.

Siulittaasoq qinerneqaqqittoq
Justus Hansen Kommuneqarfik Sermersuumit toqqagaasutut siulersuisuni siulittaasutut qineqqinneqarpoq. Suliffeqarfik 43-nik sulisoqarpoq.

Seneste nyheder / Nutaarsiassat kingulliit