KANUKOKA
Maniitsumut nooqataajumangillat
Kommunit kattuffiata KANUKOKAp allaffeqarfini naqqaniit ilusilersoqqittussanngorpaa. Sulisut tamarmik Maniitsumut nooqataajumanngillat
Kanokokami piginnaasat ilisimasallu kattuffiup ukiuni 44-ni sanarfisai annaaneqartussanngorput.
Tamanna pisussanngorpoq immikkut ittumik Kanokokap ataatsimeersuarnerani aalajangiunneqarnikuummat kattuffiup allaffeqarfia Maniitsumut nuunneqassasoq. Allaffeqarfiulli sulisuini ataasiinnarluunniit nooqataajumanngilaq.
Sulisunik nutaanik ujaarlissasut
Kanokokap Nuummi allaffeqarfiani sulisut aperineqarsimagaluarput Maniitsumut nooqataarusunnersut. Tassunga peqatigitigillugu sulisut amerlassusaat peqatigiiffiup suliassaanut tulluussarneqarsimapput. Sulisut sisamat majip aallaqqaataani suliunnaarsinneqarput taamalu sulisut maanna arfineq marluulerlutik.
- Sullissinermi pitsaassuseq qaffasissoq Kanokokap ilaasortaminut tunniuttarsimasaa annaasussanngorparput allaffissornermi sulisut ukiorpassuarni sulisuummata. Taamaasillutik kattuffiup suliassai pillugit ilisimasanik annertuunik pigisaqalernikuupput.
Atuaruk: Aalajangerneqarpoq: Kanukoka Maniitsumut nuussaaq
- Maanna tassa allaffeqarfik naqqaniit sanarfeqqittariaqalerparput. Ataatsimeersuarnermi aamma aalajangiunneqarnikuuvoq pisortatut atorfik atorunnaarsillugu allaffeqarfimmi pisortamik taarserneqassasoq. Taamaattumik allaffeqarfimmi pisortamik atorfinititseqqaartariaqarpugut sulisussarsiorneq taassuma isumagisussaassammagu, Kanokokami siulittaasoq Palle Jerimiassen oqarpoq.
Nuunnissaq ullulerneqanngitsoq
Kanokokami siulersuisut uani sapaatip akunnerani pingasunngornermi ataatsimiissapput. Nuunnissamut atatillugu isummerfigisassat arlariit tassani oqaluuserineqassapput.
- Nuunnissaq suli ullulerneqarnikuunngilaq. Tamanna maanna sulisuusut toqqissisimanngissutigaat, taamatullu siunissamut nalornisitsineq sulisunut pissuserissaarnerunngilaq. Taakkumi aamma ilaquttatik eqqarsaatigisariaqarpaat. Taamaattumik nuunnissaq ullulerneqartariaqarpoq.
- Uanga aamma piumasaraara sulisut suliunnaarnissaat sapinngisaq tamaat pissuserissaarfiunerpaamik naggaserneqassoq. Taakkumi suliarujussuaq naammassisaat pillugu qujassutissaqaqaagut, Palle Jerimiassen oqarpoq.
Atuaruk: Kirkegaard nuutsitsinissamut siunnersuummut qulartoq
Allaaserisaq tamaat sapaatip akunnerani AG-mi saqqummertumi atuaruk. Aviisi uani aamma pisiarisinnaavat: