Maniitsumi mittarfimmi pisortaq nutaaq
Mittarfeqarfiit Karl Lund Svensson Maniitsumi mittarfiup pisortaatut atorfinitsippaat ulloq 1. juuli 2018 aallarnerfigalugu.
Atorfinitsitsinermut ataatsimiititaliamit isumaqatigiittumit nalilerneqarpoq Karl Lund Svensson qinnuteqartunit tamanit piukkunnarnerpaasoq. Qinnuteqartunit qulingiluaasunit sisamat oqaloqatigineqarsimapput Mittarfeqarfinni pisortatut atorfinitsitsiniarnermi Thomas International Ltd.-ip inuttut qanoq ittuunermut misilitsissutigisartagaa ingerlanneqareermata.
– Karl Lund Svensson timmisartoqarfimmik aqutsinermik misilittagaqarnera pissutigalugu qinnuteqartunit tamanit piukkunnarnerpaasimavoq. Maniitsumi Aasiannilu AFIS-imi aqutsisutut ilistersuisullu pisortaattut atorfeqarsimavoq, taakkunanilu piumassuseqarluartuunini akisussaassuseqartuuninilu takutissimallugit, Mittarfeqarfinni ingerlatsinermut pisortaq Brian Biilamnn Hjortborg oqarpoq.
Mittarfiup pisortassaanik atorfinitsitsiniarneq sivisusimavoq suliffeqarfimmi ulapinneq pissutigalugu.
Mittarfimmi pisortaq mittarfiup ulluinnarni ingerlanneqarneranik aqutsisuuvoq, mittarfinnullu oqartussanut Mittarfeqarfinnilu aqutsisunut akisussaaffigalugit ingerlatsinermi atugassarititaasut, mittarfimmi ingerlatsinerup isumannaatsumik inatsisillu malillugit ingerlanneqarnerat ilanngullugu.