atornerluineq
Maniitsumi ikiaroornartumik atornerluineq pillugu ataatsimiititsisoqartoq
Imigassamik ikiaroornartumillu atornerluineq pillugu Maniitsup Katersortarfiani oqalliseqataanissaq innuttaasut akornannit assut soqutigineqarpoq. Atornerluinermik ajornartorsiut annertungaatsiartoq paasinarsivoq
Qeqqata Kommuniani Maniitsumi Ilaqutariinnut inerisaaviup "Ikiaroornartoq naaggaarpara"-mik qulequtserlugu innuttaasunut ataatsimiisitseqqammerpoq.
Tamanna ataasinngormat illoqarfiup katersortarfiani saqqummiisoqarneratigut oqallittoqarneratigullu pivoq.
Innuttaasunik ataatsimiisitsinerup siunertaraa, ikiaroornartumik atornerluinermik ajornartorsiutip kiisalu ilaqutariinnut peqqinnermullu kingunerluutigisinnaasai oqallisigineqarnissaat, kommuni taama ilisimatitsivoq.
Uppernarsaatit tupaallannartut
Taamatullu innuttaasut suliffeqarfiillu nalunaartussaatitaanerinik erseqqissaanissaq siunertaavoq. Matumani siuliani taakkartorneqarlutik uppernarsaatit tupaallannaqisut aallaavigalugit, pissutsinik atuuttunik kiisalu atornerluinerup kinguneranik innuttaasut ilisimaarinissaaq siunertaavoq.
Atuaruk: Meeqqat allaat 11-iinnarnik ukiullit hashitortarput
Atornerluinermik ajornartorsiut miljøarbejderimit Inger O. Lyberthimit uppernarsarneqarpoq, ilaatigut sullitat ilaannik oqaluttuassarsiarisimasani una oqaatigaa, meeqqat arlariiullutik aningaasanik katerseriarlutik ikiaroornartumik pisiniartartut, tamatumalu kingorna allamukarfissaqannginnamik qaqqamukarlutik ikiaroornartumik pujortariartartut.
Meeqqat inuusuttullu aqqanillit 15-illu akornanni ukiullit pineqarput. Atornerluinermik ajornartorsiutip assitalerlugu saqqummiunneqarnera innuttaasunit assut tupaallaatigineqarpoq.
Atuaruk: Imarsiornermik Ilinniarfiup ikioroornartoq sakkortuumik iliuuseqarfigaa
Anne Grethe Josefsen aamma Margrethe Kreutzmann Maniitsup Peqqissaavianit saqqummiinerminni, 2012-imiit 2015 tikillugu naartusut aappaasut uijsullu katillugit 39-t ikiaroornartumik atornerluisuunerinut katsorsarneqarnissaannik innersuussisimanerminnik paasissutissiipput.
Kisitsisit taakku saniatigut ikiaroornartumik atornerluisut amerlanerunissaat naatsorsuutigineqarpoq, kisitsisillu ernumanaatissaqarnermik takussutissiipput.
Qeqqata Kommuniani pitsaaliuinermi siunnersorti Albrecht Kreutzmann ima oqaaseqarpoq:
- Meeqqap inuusuttuaqqallu timikkut qarasakkullu suli inerikkiartorfissaminni aallartissutigigaangamikkik misiliinerinnakkulluunniit qaratsakkut innarlerneqaatigereertaraat aarlerinarnerpaajusarpoq.
Maniitsumi ikiaroornartumik atornerluinermut akiuunnissamut inuiaqatigiit ataatsimoorlutik akiuunnissaat Peqqissaavimmi sulisunit kaammattuutigineqarpoq.
Ikiaroornartoq pillugu Sermitsiaq.AG-p allaaserisai tamaasa uani atuakkit