Maniitsoq
Maniitsumi Efterskolimi pisortaq taamaatippoq
Atuarfimmi ukiuni pingasuni pisortaasimasoq Kunuunnguaq Olsen taamaatippoq. Taartissaalu nanineqarpoq
Jakob Møller Lyberth efterskolimi pisortanngorpoq.
Taassuma kingoraarpaa Kunuunnguaq Olsen 2012-imit forstanderitut atuussimasoq.
Jakob Møller Lyberth oktoberip aallaqqataani sulilertussaq ilinniartitsisutut ilinniagartuutullu ilinniagaqarsimasutut tunuliaquteqarpoq, kiisalu atorfilittut aqutsisutullu misilittagaqarluni.
Suliffigisimasaasa ilagaat Knud Rasmussenip Højskolia Sisimiuniittoq, kingullertigullu Qeqqata Kommuniani Maniitsumi pisortaanerup sulisuinut pisortatut atuuppoq.
Atuarfik ineriartussaaq
Ukiut siulliit illumut atortunullu tunngasutigut nukippassuarnik atuiffiusimasut, maannakkut efterskolip perorsaanermut atuartitseriaaseqarnermullu maannamut killiffianit piorsaanissaq piffissanngortoq, efterskolip siulersuisuni siulittaasuat John Biilmann oqarpoq.
- Jakob Møller Lyberth ilisarisimavarput inuiaqatigiinni kalaallini, nunarsuarmioqatigiinnilu, pissutsinik soqutigisalittut qaammaasalittullu. Maniitsumi Efterskoli siuttortaarpoq efterskolertut siunissami innuttaalluartuunissaannik ilinniartitsinermut anersaaqartumik, siulittaasoq taama oqarpoq.
John Biilmannip aamma Kunuunnguaq Olsen aalajaatsumik pitsaasumillu sulilluarsimaneranik qujaffigaa.