Maniitsormiut Qeqqata Kommunianit anerusuttut

Maniitsup Qeqqata Kommuniani ilaasortaaginnarnissaa pillugug innuttaasunik ataatsimiisitsisoqarpoq pingasunngormat, inunnit 30-nit peqataaffigineqartumit.

Maniitsumi innuttaasut oqariartuutaat ersarippoq, Qeqqata Kommunianimi anerusupput.

- Inassutigaarput nalilersuinerit sukumiisut ingerlanneqassasut kommunerujussuup kingorna ingerlatsinermi aqutsinermilu pitsaaqutaasut ajoqutaasullu qulaajartillugit. Borgmesteri maqaasivarput, qinikkat innuttaasunut ungasillisimapput, ingerlatsinermi aqutsinermilu oqimaaqatigiinngitsumik inissisimasoqarpoq, amigartumik qitiusumit paasitinneqartarpugut – suut iluatsippat suullu iluatsinngillat?, Innuttaasut Suleqatigiissitaasa siulersuisuini siulittaasoq Mads Petersen tusagassiutinut nalunaarummi allappoq.

Taasititsisoqarnissaa kissaatigineqarpoq
Innuttaasut Suleqatigiissitaasa siulersuisuisa taasititsisoqarnissaa kissaatigineqarpoq, tassani Maniitsumi innuttaasut aperineqassapput kommunerujussuarmiiginnarusunnersut.

Qeqqata Kommunianiiginnarnissarli aamma suli ammaffigineqarpoq.

- Pingajuattut inassutigaarput isumalioqqutigineqassasoq avissaartoqanngikkaluarluni maannamut pissutsit atuuttut nutarterlugit qanoq sunillu pitsanngorsaateqartoqarsinnaanersoq. Maniitsormiut piumassuseqarpugut illoqarfipput nunaqarfittagullu eqqissisimanartut siuarsassallugit, kinguleruunnerput utaqqiinnarata nammineq iliuuuseqarfigerusupparput, Mads Petersen oqarpoq.

Naggaatigut ataatsimiigiartut Maniitsup siunissaa pillugu taasitinneqartuusaarput. Taasisut 73 procentii isumaqarput Maniitsoq kingumut kommuninngoqqissasoq, taasisut 8 procentii isumaqarput Qeqqata Kommunia ataannassasoq, taasisut 19 procentii taaseqataanngillat.