miss earth

Maniitsormiu Miss Earthimut peqataassaaq

Wienimi Miss Earthimi unammisitsisoqalerpat kalaaleq peqataassaaq

Maniitsormiu Nulle Josephsen

Kalaallit Nunaannit arnat pinnersut pinnerneqqusaatitsinerni arlariinni peqataassapput.

Aki-Matilda Høegh-Dammip Miss Danmarkimi ullualuit qaangiuppata peqataanissaa sioqqullugu, arnamik allamik pinnerneqqusaatitsinermi unammisitsinermi Østrigimi pisussami peqataasussanngorpoq.

Tassami Maniitsuminngaanneersoq Nulle Josephsen Miss Earthimi unammeqataasussanngorpoq. Tassani unammisitsinermi avatangiisit pinngortitarlu qitiutinneqarput.

Takisooq pinngortitamillu soqutiginnittoq
Nulle Josephsen 20-nik ukioqarpoq 1,76 centimeterisut takissuseqarluni. Ilinniarnertuunngorniarfimmi nasartaaqqammerpoq, Wienimilu Miss Earthimi unammisitsinermi decembarip tallimaani peqataassalluni.

Miss Earthimi unammisitsinermi arnat 100-t peqataassapput.

- Kalaallit assigalugit pinngortitaq qanigisaralugu peroriartorpoq. Kalaalerpalaartuuvoq ammalluni sapiissuseqarluarlunilu, Kalaallit Nunaannit peqataasussamik aalajangiisoq Aviaaja Hammeken Schultz oqarpoq.

Aningaasaliisussarsiorneq
Aviaaja Hammeken Schultz modelbureaumik ammaaqqammerpoq Inuit Modelsimik ateqartumik. Nulle Josephsenip peqataanissaanut atatillugu aningaasaliisussanik maannakkut ujaasileruttorpoq.

Miss Earthimummi peqataatitsineq akikitsuinnaanngilaq.

- Peqataanissamut akiliummut, aningaasartuutinut, atisanullu akikinngitsunut pisinissamut aningaasaliisussanik ujaasivugut. Taamaattumik assigiinngitsunut qinnuteqaqattaarpugut, Aviaaja Hammeken Schultz oqarpoq.

- Nulle Josephsenip peqataanissaanut aningaasaliisoqarpat taava Nunarsuarmioqatitta Kalaallit Nunaat ilisimanerulissavaat peqataaneratigut. Kalaallit Nunaata periarfissai aamma saqqummiunneqassagaluarput, oqarpoq.

Powered by Labrador CMS