Pinngortitami ajunaarnersuaq
Malissuaqarneranit maqaasineqartut ujaarineqarnerat politiinit taamaatinneqartoq
Inuit sisamat nunaqarfimmi Nuugaatsiami qarsutsinersuaqarnerata kingorna ajunaarsimasinnaanerat ilimagineqarpoq. Ujaarineqarneralli massakkut unitsinneqarpoq
Nuugaatsiami qarsutsinersuaqarnerat kingorna inersimasut pingasut meeqqallu ataatsip ujaarineqarnerat, unitsinneqarpoq.
Kalaallit Nunaanni Politiit tusagassiuutinut nalunaarummi paasissutissiipput.
Juunip ulluisa 17-ni qarsutsinersuaqarnerup kingorna inuit sisamat taakku timmisartumit, qulimiguulinnit, umiarsuarmit umiatsiamillu pullattakkamit arlaleriarlutik ujaarineqartarsimangaluarput. Angusaqarfiunngitsumilli.
Maqaasineqartulli sisamat tamarmik ajunaarsimanissaat ilimagineqartoq, sapaatip-akunnerata siuliani politiit paasissutissiaraat.
Uummannap eqqaani Karrat kangerluani nunap sisoornera sakkortungaamat nunaqarfimmi illut isikkanillit imaanut amuneqarput, taakkuli inuit sisamat aamma amuneqartunut ilaallutik.
Issittumi Sakkutooqarfiup uuttortarsimasai aallavigalugit nuna 1100 x 300 meterit missaani sisoorsimavoq.
Piffimmi nunap sisooqqinnissaa ernummatigineqarnera pillugu piffimmi nunaqarfiit innuttaasui qimangutsinneqarsimapput.
Kangerlummilu nunap sisooqqissinnaanera suli aarlerissutigineqarpoq, kisianni arfininngormat oqartussat nalilerpaat taama pisoqassangaluarpat nunaqarfinni tallimani Uummannamilu innuttaasut navianartorsiortinneqassanngitsut.
Geus - de nationale geologiske undersøgelser for Danmark og Grønland ilaatigut naatsorsorsimasaannut politiit tikkuuaapput.
Taamaammat Niaqornani, Saattuni, Ukkusissani, Ikersanni, Qaarsunni Uummannamilu innuttaasut arfininngormalli eqqissiallassimaqaat.
Niaqornaniillu qimangutsitsinerup atorunnaarsinneqarnera Namminersorlutik Oqartussat ataatsinngornermi paasissutissiaraat.
Nunanalu sisooqqilissangaluarpat sillimaniarneq pillugu Nuugaatsiami Illorsuarnilu innuttaasuisa qimangutsinneqarsimanerat suli atuutsinneqarpoq.
/ritzau/