Saqqummersitsineq
Malînánguup suliarpassui saqqummersilerpaat
Malînánguaq M. Mølgaardip suliai Nuuk Kunstmuseumimi ataasinngornermiit saqqummersinneqassapput
Nammineq aqqusaarsimasat nunattalu oqaluttuassartaata ilaa kingumut qiviarfigalugit Malînánguaq M. Mølgaardip qalipagai Nuuk Kunstmuseumimi ataasinngornermiit qimerloorneqarsinnaalissapput.
Qalipakkat amerlanersaat imilertakkanik qalipagaapput tassanilu ilaatigut takuneqarsinnaapput illoqarfiit Malînánguaq M. Mølgaardip najugaqarfigisimasai.
- Qalipakkanni pingaartinnerpaasarpara Kalaallit Nunaata ilorpiaata, anersaavatalu oqaluttuatoqqatigut takutinnissaa, aammali ulluni nutaaliaanerusuni pisut takuterusuttarlugit. Qalipakkat sapinngisamik qalipagaannaanatik oqariartuuteqarnissaat, anersaaqarnissaallu pingaartittarpara. Qullissat inunngorfinga, Aasiaallu Qullissaniit nuuffigisarput qalipakkani ilaapput. Nuup ilisarnaatai qaqqat, sassumallu arnaa ilaapputtaaq. Tammatsaaliinissaq nunattalu ineriartornerani aqqusaakkat oqaluttuarisaanermi ilaasut, takusassiaraakka, kinguaassanut qaqugumut takusassaaqqullugit, Malînánguaq M. Mølgaard oqarpoq.