Qeqqata Kommunia
Malik Berthelsen: Ikiaroornartoq ajornartorsiutaasorujussuuvoq
Qeqqata Kommuniani imigassamik hashimillu ajornartorsiuteqarnerit akiorneqassappata annertunerusumik iliuuseqartoqartariaqarpoq, borgmesterinngortussaq Malik Berhelsen (S) oqarpoq
- Qeqqata Kommuniani inuuniarnikkut annertuumik ajornartorsiortoqarpoq, taamaammat suliat sukkanerusumik aaqqiivigineqartarnissaannut inunnik isumaginninnikkut suliaqartunik amerlanerusunik atorfinitsitsinissaq sulissutigissavarput.
Qeqqata Kommuniani qaammatip tulliani borgmesterinngortussaq, Malik Berthelsen (S) taama oqarpoq.
- Kommunimi ajoraluartumik hashimik annertuumik ajornartorsiortoqarpoq, inersimasunik ingammillu inuusuttut akornanni. Amerlasuut tamanna pissutigalugu suliffeqarniarnerminnik ajornartorsiortarput, taamaalillutillu aningaasaqarnikkut ajornartorsiortarlutik. Naalakkersuisut aqqutigalugit taamaammat ilanngaaserisumik atorfinitsitsiniarpugut, hashimik akiueqataasussamik, taanna Sermitsiaq.AG-mut oqarpoq.
Atuaruk: Qeqqata Kommuniani suleqatigiinnissamut isumaqatigiissut aajuna
Saqqumiinnartumik tuniniaasartut
Pisortanit tapiissutit atorlugit imigassamik ikiaroornartumillu pisisoqarsinnaajunnaarnissaanik kommuni sulissuteqarniartoq, tamatuma saniatigut oqaluttuaraa.
- Inatsisitigut taamaaliortoqarsinnaanersoq misissussavarput, Malik Berthelsen erseqqissaavoq.
- Pisortanit tapiissutisisartut aningaasat imigassanut hashimullu atortaraat kommunip qanoq ililluni nalunngilaa?
- Inuiaqatigiinni amerlanngitsuni inuuvugut, qanorlu pisoqartarnersoq nalunngilarput. Pisortat ikiorsiissutaat tunniunneqaleraangata, ikiorsiissutisisartut nalunaaqutaq 24.00 missaani aningaaserivimmut aningaasanik aallertartut innuttaasunit tusartarparput. Hashinik tuniniaasartorpassuit aningaaseriviliarlutik tuniniaasartut tusartarparput.
Atuaruk: Malik Berthelsen: – Borgmesterinngorniarlunga qinigassanngortippunga
Teknologiimik atuineq
- Pisortanit tapiissutisisartut aningaasaatitik sumut atortarneraat kommunip paasiniarpaa?
- Naagga, tamanna angunianngilarput. Pisortanit tapiissutit teknologii atorlugu tiguneqartarsinnaanersut misissorniarparput, immaqa tapiissutinik pisartagaqartut pisiniarfinni kortinik nerisassaannarnut atorsinnaasaannut tunillugit. Pisortanit tapiissutit imigassamut hashimullu atorneqarsinnaajunnaarnissaat sulissutiginiaratsigu, Malik Berthelsen erseqqissaavoq.
- Pisortanit tapiissutit pisariaqartitanuinnaq atorneqassapput. Nerisassanut, imigassamik hashimillu pisinermuunngitsoq. Politiit suleqatigalugit saqqumiinnartumik aningaaseriviup eqqaani ikiaroornartumik tuniniaaneq unitsinneqassaaq, Malik Berthelsen oqarpoq.
Atuaruk: Siumut Qeqqata Kommuniani ajugaavoq