Atorfittaartoq

Maliina AWG-mi pisortanngussaaq

2016-mi Arctic Winter Gameseqarnissaani pisortatut Maliina Abelsen septembarip aallaqqaataani atorfinissaaq. Inatsisartuni sulinngiffeqarniarluni aamma aalajangerpoq

Maliina Abelsen Inatsisartuni sulinngiffeqarniarpoq Arctic Winter Gamesimilu general managerinngussalluni.

Siornatigut aningaasaqarnermut naalakkersuisoq maannalu Inuit Ataqatigiit sinnerlugit Inatsisartuni ilaasortaq Maliina Abelsen 2016-mi Arctic Winter Gameseqarnissaani pisortatut atorfinittussanngorpoq. Pisussaq taanna timersornikkut Nunatsinni aaqqissuussat anginersarissaat nunani issittuni timersortartut kulturimillu suliaqartut 1.500-ut sinneqartut Nuummi katersuutilerpata.

Aappassaa Arctic Winter Games Nuummi pisussanngorpoq siullermik 2002-mi Nunavummi Iqaluit aaqqissuussamik avitseqatigalugit aaqqissuunneqarpoq. Maanna aaqqissuussaq tamarmi Nuummi pisussanngorpoq ishockeymi unamminissat Iqalunni pisussat eqqaassanngikkaanni.

Arctic Winter Games 2016-mi pisortatut atorfik aamma general managerimik taagorneqartoq inuttassarsiorneqarnikuuvoq Arctic Winter Games 2016-milu aqutsisut atorfinittumik toqqaapput.

Piumassutsimik sulisut 1.400-ut
- AWG nunami imminermi pissutsinik ilisimasaqarluartumik siuttoqalissaaq, inerititaqarsinnaasumik ataatsimoornermillu pisortani namminersortunilu ingerlatsinermi piginnaasalik Maliina aqqutigalugu, AWG-mi aqutsisut siulittaasuat taama Christian Keldsen paasissutissiivoq.

Maliina Abelsen atorfittaassamini septembarip aallaqqaataani aallartissaaq Arctic Winter Gamesimullu piareersaatit aallartereerput.

- Pilersaarut inuiaqatigiinni ataatsimoornermik anersaamillu pitsaasumik pilersitsinissamik siunertalik qilanaaraara suliarissallugu. Arctic Winter Games 2016 iluatsissappat pisariaqarpoq pisortat, namminersortut, kattuffiit inuinnaallu akunneranni pissusilersuutit akimorlugit suleqatigiittoqarnissaa, Maliina Abelsen oqarpoq.

- Qilanaarpunga nukiit pineqartut ataatsimoortissallugit isertussanngilarali tamanna atorfimmut akuersininnut annertuumik pisooqataasimammat. Qulakkeerinneqataaffigerusuppara nunatut tulluussimaarnissarput naammagisimaarnissarpullu, AWG’p nunatsinni ingerlanneqarnissaani. Pisutut allatuulli ingerlanneqassanngilaq pilersaarutitullu pingaaruteqartutut ingerlanneqassalluni, piginnaasanik pitsaasunik, peqqinnermik, timersornermik, kultooritigut oqaatsitigullu paarlaasseqatigiinnermik inerititaqarfiusoq, Maliina Abelsen nammineq sisoraatinik oqilaniuttartutut 1992-mi Arctic Winter Gamesimi unammeqataasimasoq oqarpoq.

Inatsisartuni sulinngiffeqassaaq

2014-mi Arctic Winter Games Alaskami Fairbanksimi naammassippat Arctic Winter Gamesip erfalasua Nunatsinni aaqqissuisunut tunniunneqassaaq.

Arctic Winter Gamesip aaqqissuunnerani suliassap ilarujussua nammineq piumassutsimik ikiuuttunit naammassineqartarpoq. 2016-mi Arctic Winter Games ingerlanneqalerpatn nammineq piumassutsimik ikiuuttut 1.400-ut missaat pisariaqartinneqartussaapput.

Aningaasartuutit amerlanersaat Kommuneqarfik Sermersuumit aamma Namminersorlutik Oqartussanit akilerneqassapput. Namminersorlutilli inuussutissarsiortut aamma aningaasaleeqaassapput.

Arctic Winter Games-imi pisortatut atornittussanngornini pissutigalugu Maliina Abelsen Inatsisartunit sulinngiffeqarniarluni qinnuteqarpoq.

- Sulinngiffeqarnissamik qinnuteqaateqarpunga, suliffissaq pisortaaffiummat, sulisumit piumaffiginniffioqisoq. Imaanngilaq naalakkersuinikkut sulinermit tunuartunga, kisiannili piffissami aalajangersimasumi naalakkersuinikkut sulinermit illuallarallartunga. Isumaqarpunga inuttut naalakkersuinikkullu suliaqartutut pitsaasuussasoq ukiorpanngortuni oqaluuserisimasamma tigussaasunngortinnissaa peqataaffiligissagakku tassalu: soqutigisaqaqatigiit akimorlugit ataatsimoorluni kivitseqatigiinneq, Maliina Abelsen oqarpoq.

Powered by Labrador CMS