Maliina Abelsen suliffittaarnissaminut piareertoq

Atorfinitsitsiniarluni suliap ingerlanneqarnerani Air Greenlandip immikkut pingaartitsimasaa tassaavoq qinnuteqartut akornanni aqutsinikkut misilittagaqarluarnissaq, suliffeqarfiup pingaarnertut niuerutaanik ilisimasaqarluarneq, tassaasullu kalaallit, aammalu suliffeqarfimmik aqutsinermi niuernerpalaartumik aallussinissaq.

Inunnik ukkassineq pingaaruteqartoq
- Nuannaarutigisorujussuuara Maliina Abelseni tuniniaanermi pisortassatsitut nutaatut saqqummiussinnaagakku. Inuk pissarsiariniagarput tassaasimavoq niuernerpalaartumik pingaartitsisoq, nunami maani niuerfitsinnut aammali niuerfinnut nunani allaniittunut tunngatillugu. Tamanna ima paasisariaqarpoq inuk tassaassasoq atuisunik kiffartuussinitsinni, aamma atuisut misigisaannik pitsanngorsaanissamik pilersaarusiukkamik aallussinitsinni, taamaaliornikkullu tunisassiatsinnik pitsanngortitsinermik kinguneqartussamik ippinnaateqanngitsumik peqataalersussaq, pisortaaneq Michael Højgaard oqaluttuarpoq.

- Kalaallit Nunaanni niuerfimmut tunisassianik pitsaasunik tunniussisinnaaneq inuiaqatigiinnik ilisimasaqarnermik akulerusimanermillu pisariaqartitsiffiuvoq. Ilutigitilluguttaaq takornariat amerlanerulersinnissaat pilersaarutitsinnut ilaavoq, aallussinissaq tamanna nunat tamalaat akornanni attaveqarfeqarnissamik aamma niuerfinnik allanik paasinninnissamik pisariaqartitsiffiusoq.

Tunniussisinnaasoq
- Maliina Abelsenip sulilerneratigut aqutsisumik sanngisuumik sulisoqalissaagut, suliffeqarfinni annertuunik piumasaqaateqarlunilu sallersatut ingerlasunit misilittagalimmik, Michael Højgaard oqarpoq.

Maliina Abelseni ukiuni siuliini Arctic Winter Gamesimut, maannamut Kalaallit Nunaanni aaqqissuussat annersaannut, siuuttuuvoq, aammalu politikkimik suliaqarnini, ilaatigut aningaasaqarnermut naalakkersuisutut, sioqqullugu Maliina FN’ip ataani Inuit Pisinnaatitaaffiisa allattoqarfiani aamma nunanut allanut pisortaqarfimmi sulisimavoq.

Abelsen maanna Tele-Postip siulersuisuini siulittaasumut tulliuvoq.

Februaarip qaamaataani maani Sermitsiaq.AG-mi oqaluttuaraarput, Abelsen politikkimut aamma isumaginninnermut tunngasunik uteqqinnianngitsoq.

Atuaruk: Maliina Abelsen politikkimut uternianngilaq

Sullissineq ukkatariniaraa
Siornatigut politikeriusimasoq Maliina Abelsen sociologimi kandidatiuvoq, kiisalu politikkimi aamma inuit atugaannut tunngasuni masteriulluni.

Maliina Abelseni atorfinittussanngornini pillugu nammineq ima oqaaseqarpoq:

- Suliffeqarfimmi inuiaqatigiinni kalaallini qitiusumik inissisimasumi, aammalu sanngisuumik kulturilimmi kiisalu ineriartortuarnissamik anguniagaqarfiusumi sulilernissara qilanaarisorujussuuara. Air Greenlandip siuuttutut, aammalu sutigut tamatigut pitsaanerpaamik kiffartuussinerminik ingerlatitseqqinnissaa qulakkeerniarlugu suleqataaffiginissaa pissanganassaaq.

Maliina Abelseni Arctic Winter Gamesimi atorfeqarnini naammassiniariarpat tuniniaanermut pisortatut 1. oktobari sulilissaaq.

Atuaruk: Tele-Postimi Maliina siulittaasup tulliatut inissippoq

Atuaruk: Naak kaammattuisoqaraluartoq: Maliina qinigassanngortissanngilaq