Nice

Maliina Abelsen Nicemi halvmarathonerpoq

Timigissaatigalugu arpattartut ilaat, peqatigiiffik Naapemeersut, takorluukkaminnik piviusunngortitsipput Nicemi halvmarathoneqataagamik

Maliina Abelsen Nicemiit Cannesimut halvmarathonimi arpaqataavoq Nuummi timigissaatigalugu arpattartut peqatigiiffianneersut, Naapemeersut, peqatigalugit

Uagut sapaammi ullaap tungaani eqqisseqqinnaarluta kaffisuunnitta nalaani, timigissaatigalugu arpattartut peqatigiiffianni, Naapemi Nuummersumit, ilaasortat Nicemiit Cannesimut halvmarathonerlutik arpapput.

Naapemi ilaasortat arlallit tamanna sioqqullugu eqqartortarsimavaat arpatsitsinermi taama ittumi peqataarusussinnaalutik, immaqalu feeriassatik tamatumunnga atorusussinnaallugit.

Taama takorluuineq qanoq perianngitsut piviusunngorpoq, arpattartullu nunatsinneersut peqataaniarlutik nalunaarput sapaammilu arpaqataallutik.

Naapemeersut 12-it Nicemi arpannermi peqataapput
Nunatsinnit arpaqataasut ilagaat, Maliina Abelsen, Arctic Winther Gameseqarnissaanut pisortaq.

- Assut nuannerpoq! Kalaallit erfalasuanik assiliartalimmik kiateqarlunga arpappunga, Naapemeersunik inunnik ilakkuminarluinnartunik arpaqateqarlunga. Kisianni arpanngitsiarninni nuakkama timima tamanna malugisinnaavaa. Taamaammat 15 kilometerit arpareerlunga arriillilaarpunga minutsilu qasuersilaarlunga, tassanilu ullaakkorsiutikka anipput. Kisianni massakkut tamanna pisoq eqqaallugu illaatigiinnartarpara, nuannaarutigeqaaralu peqqillunga arpaqataasinnaangama, Maliina Abelsen oqaluttuarpoq. Taanna peqqiillioraluarluni arpannini 1.51.18 atorlugu naammassivaa.

Feeriarneq pitsaasoq
Taassuma oqaluttuaraa Naapemi ilaasortat imminnut annerusumik ilisarisimareersimanngitsut, kisianni illaqatigiissimaqisut, arpaqatigiillutik imminnut tapersersorlutik.

- Ilaat arlaleriarlutik marathonertareersimapput, uffa ilaannut aatsaat misiliinerusoq. Uangalu aamma allamik marathoneqateqarpunga. Feeriarneruvoq pitsaasoq. Takusaqarpugut, soqutigisarput aallupparput, aamma nutaanik ikinngutitaarpugut, Maliina Abelsen oqaluttuarpoq.

Timigissaatigalugu arpattartut peqatigiiffiannit peqataasut tassaapput Uiloq Mathæussen, Hartvig Heilmann, Aviâja Heilmann, Peter Schriver, Martin Kviesgaard, Lene Kviesgaard, Charlotte Bech, Claus Bech, Ole Baunbæk, Lene Baunbæk, Hanne Nyborg uialu, Ole Kielmann, Peter Wistoft aamma Malina Abelsen.

Powered by Labrador CMS