Sermersooq
Malene Lynge ataatsimiititaliami siulittaasutut tunuarpoq
Charlotte Ludvigsen siulittaasunngorpoq
Kommuneqarfik Sermersuumi Isumaginninnermut, Suliffeqarnermut Inuussustissarsiornermullu ataatsimiititaliap Charlotte Ludvigsen (IA) siulittaasorileraa Kommuneqarfik Sermersooq nalunaaruteqarpoq.
Ataatsimiititaliap siulittaasuata, Malene Lyngep peqquteqavilluni tunuarniuteqarnerata kingorna Charlotte Ludvigsen ataatsimiititaliap kingullermik ataatsimiinneranni siulittaasutut toqqarneqarpoq.
Atuaruk: Malene Lynge Kommuneqarfik Sermersuumut uteqqippoq
29-nik ukiulik
Charlotte Ludvigsen 29-nik ukioqartoq Rigsombudeqarfiup allaffiani fuldmægtigiuvoq. Ataatsimiititaliami Charlotte Ludvigsenip siulittaasutut sulilernissani qilanaaraa.
- Kommunalbestyrelsemi ilaasortanngoramali Isumaginninnermut, Suliffeqarnermut Inuussustissarsiornermullu ataatsimiititaliami ilaasortaavunga, taamaattumik tassani suliassat suunersut ilisimaaralugit. Suliffeqanngitsut, innarluutillit aamma utoqqaat nunaqqatigut pitsaasunik atugassaqartinneqarnissaat anguniarlugit siulittaasutut sullissinissara qilanaaraara, Charlotte Ludvigsen oqarpoq.
Ilaasortaaginnassaaq
Malene Lynge ataatsimiititaliami ilaasortatut ingerlaannassaaq taamatullu kommunalbestyrelsimi ilaasortatut aamma ingerlaannassalluni.