Overfiskeri
Makrel-it pillugit isumaqatigiinniarnerit kinguartinneqaqqipput
Savalimmiut makrel-inik aalisarpallaarnerannik aaqqiagiinngissuteqarneq ukiuni tallimani ingerlasimavoq, maannalu isumaqatigiinniarnissat kinguarteqqinneqarput
Makrel-ilerngusaannermik taaneqartumik isumaqatigiinniarnerit, ulluni kingullerni Londonimi ingerlanneqarsimasut, kinguartinneqarput, illua'tungeriillu avissaaqqipput.
Illua'tungeriit, EU-p saniatigut tassaasut Norge, Island aamma Savalimmiut, ataasinngornermi februaarip 17-ianni naapeqqissapput makrel-it, Savalimmiut aalisarpallaagai, pillugu isumaqatigiinniarnerit nangissallugit. Aaqqiagiinngissuteqarneq ukiuni tallimani ingerlasimavoq.
Savalimmiuni makrel-inik ammassassuarnillu aalisartut EU-p umiarsialiviinut tikeqqusaanngillat, tassa Atlantikup avannaani nunanik allanik isumaqatigiissummit amerlanerusunik aalisartarmata.
Isumaqatigiinniarnerit nangeqqinneqarsimapput EU-p suliniuteqarneratigut, ilanngullugillu aamma ammassassuit saarullernallu isumaqatigiinniutigineqarput.
– Tupinnaqaaq ingerlaqqittoqarsinnaasimanngimmat, pakatsinaqaarlu. Tamanna sapaatip akunnerata naanerani isumaliutigissavara, Christian Olesen, Danmarks Pelagiske Producentorganisation-imi siulittaasoq oqarpoq.
Peqatigiiffimmut ilaasortaapput Danmarkimi angallatit aalisakkanik ikerinnarsiortartunik taaneqartartut.
Aamma atuaruk: Makrel-ilerngusaannermi Nunarput tatineqarpoq
Sapaatip akunnerani tullermi EU Norgelu immikkut Nordsømi aaqqiagiinngissuteqarneq pillugu isumaqatigiinniassapput. Naatsorsuutigineqarsimagaluarpoq makrel-ilerngusaanneq isumaqatigiinniutigineqaqqaassasoq.
EU aggustimi Savalimmiunut killilersuilerpoq, tassa Savalimmiut isumaqatigiissutigineqartunit ammassassuarnik pingasoriaammik amerlanerusunik makrel-inillu sisamariaammik amerlanerusunik aalisartarmat.
Tamanna pissutiglaugu Savalimmiormiut EU-p umiarsualiviinut tikeqqusaajunnaarput, nunallu EU-mut ilaasortat ammassassuarnik makrelinillu savalimmiunit piseqqusaanngillat.
Taamaattumik piffissami kingullermi savalimmiormiut aalisakkat Ruslandimut, Asiamut Afrikamullu tunisarsimavaat.
Savalimmiulli EU-mit pineqaatissinneqarnertik akueriumanngilaat, siusinnerusukkullu EU nunarsuarmi niueqatigiiffimmut WTO-mut suliassanngortippaat.
Savalimmiormiut islandimiullu tunngavilersuutigaat Atlanikumi aalisakkat nunamik toqqaviannut qaninnerulersimasut, taamaattumik amerlanerusunik aalisarsinnaallkutik.
Savalimmiut Naalagaaffeqatigiinnut ilaavoq, suliassarlu Danmarkikkoorpoq, siusinnerusukkut savalimmiormiunut pisinnaatitsisimasumit.