ernumaneq
Mæslingenik nappaalasoqalersinnaasoq
Nuummi meeqqat 15-it sinnerlugit qaammatillit affaannai mæslingenut, savarnermut rødehundenullu akiuussutissamik kapineqarsimapput. Nappaalasoqarnissaa Dronning Ingridip peqqissaavianit ernummatigineqarpoq akiuussutissamik kapitinnissamut ulloqarartitsillutik
Angajoqqaat meeqqamik MFR-vaccinemik taaneqartartumik kapitinnissaat puigortarpaat, tamannalu Nuummi Dronning Ingridip peqqissaaviani sulisut ernummatigaat.
Kisitsisit nutaat takutippaat meeqqat 15-it sinnerlugit qaammateqartut taamaallaat affaasa missaat akiuussutissamik kapineqartartut, tamannalu 95 procentit kapitissimanissaannik taamaalillutillu nappaalanissaminnut qulakkeerneqarnissaannik kissaateqarnermit annikinneroqaaq.
Ukiorpassuarni mæslingemik tuniluuttoqarsimanngilaq. Nappaataavoq 1950-ikkunni Kalaallit Nunaanni annertuumik eqquisoq. Taamanikkut illoqarfiit nunaqarfiillu mattussaasarput nappaatip nakorsaaserneqanngikkuni toqussutaasinnaasup tuniluutiaqisup tuniluunnissaa unitsinniarlugu.
Mæslingit meeqqat nappaatigaat tuniluutiasupilussuit, ilaannikkut annertuumik ajuuteqalernissamik toqumilluunniit kinguneqarsinnaasoq. Inersimasut ingammik sakkortuumik eqqorneqartarput. Maanna annertuumik akiuussutissanik kapitittarnerit aqqutigalugit annikitsumiitinneqarpoq, meeqqat 15-it sinnerlugit qaammatillit akiuussutissamik kapisarnerisigut.
Annikinnerusumik nappaalasoqalersartoq
2010-miilli akiuussutissaq meeqqat sisamanik ukioqalerneranni kapputigineqaqqittarpoq taamaalilluni inuuneq tamaat mæslingenut, rødehundenut savarnissamullu illersugaalluni. Meeqqat qulit missaanni ukiullit angajulliunerusullu kapiteriaaseq pisoqaanerusoq atorpaat Nuummilu atuarfinni peqqissaasut meeqqat 12-nik ukiullit kapisarlugit.
Ikippallaat kapinnissamut peqataanerisigut ernummatigineqarpoq inuit arlaqartut nappaammik qunugineqaqisumik eqqugaasalersinnaannginnersut.
- Ukiut tamaasa inuit mæslingenik tunillatsissimasut takkuttarput, ilaannikkullu annikinnerusumik nappaalasoqalersarluni. Eqqarsaatigigaannilu qanoq Danmarkip Kalaallillu Nunaata akornanni angallattoqartiginersoq inuit mæslingenut kapitissimanngitsut tunillanneqariaannaapput. Taamaattumik pingaarluinnartuuvoq meeqqat 15-it sinnerlugit qaammateqartut MFR-imik kapineqarnissaat mæslingemik nappaalanissaq pinngortoorsissagaanni, Dronning Ingridip peqqissaaviani nakorsiartarfimmi nakorsaq Michael Lynge Pedersen oqarpoq.
Dronning Ingridip peqqissaavia maanna saniatigut arfininngornermi februaarip sismaani ammaniarpoq, tassanilu piffissamik inniminneeqqaaraani meeqqanut 15-it sinnerlugit qaammatilinnut MFR-vaccinerisoqassaaq.
Allaaserisaq tamaat AG-mi atuaruk, taanna ullumi pisiniarfinniilerpoq. Aviisi uani aamma pisiarissallugu periarfissaqarputit: