Maanna ajugaasariaqarput

Kalaallit arnat arsaattartut NORCA-mi pissartanngorniunnerni semifinalimi USA 18-20-mik ajorsarfigaat.

Taamaasillutik Panamerikanerit Pissatanngorniutivinnernut anngunniassangunik, unnugu Dominikanske Republikanerit bronzinnanniunnerminni ajugaaffigisariaqarpaat.

USA-mut unammineq ilimagineqareertutut unamminerup naammassineqarnissaata tungaanut pissarganarsimavoq.

Unammisut tamarmik pissangallutik aallartissimapput, unamminerullu immikkoortuani siullermi unammisut katillugit 19-eraaginnarlutik, USA-mut 10-9. Unammineq siulleq aallaavigalugu, tamarmik qanoq unamminissartik isumaqatigiissutigisimavaat, unamminernimimi siullermi arsarluartut immikkut paarineqarluarsimapput.

Unamminerup ingerlanerani paarlakaallutik siuaqattaarsimapput, holdillu tamarmik unamminerup ilaani isertitsiniapiloortarsimallutik.

- Unammineq nuannerluinnartoq ajorsaratsigu uggornarpoq. Ugguarnerput naggataani unammisartuutitsinnut ilinniutaassaaq, nunanut allanut sungiusaasoq Johannes Groth oqarpoq.

- Unamminerup naammassineqarnissaa tikillugu akersuupput. Unamminerullu inerneranut kukkuluttornerit patsisaanerpaapput.

- Kinguarsimasuni isumaqatigiissutigut iluatsipput, taamaasillutik immikkoortut tamaasa taamaallaat quleraarfigaat. Ajoraluartumillu uagut immikkoortut marlunni katillugit quligiluaraarfigaangut.

- Taamaammat NORCA-mi pissartanngorniutivinneq pingaarutilerujuuvoq. PAN AM-imi peqataannginnermi unamminerit assoroorfiit ingerlanneqarsinnaapput, unammisartullu misilittagaqarnerulissallutik. Ajoraluartumillu massakkut misilittagakinneq akisunaarparput.

USA-mut ajorsarnerup kinguneraa, nunanut allanut unammisartut pissartanngorniunnerni unamminerit sisamat tamaasa ajorsarfigaat.

Taamaakkaluartoq Johannes Groth unamminissamut kingullermut neriulluarpoq.

- Dominikanerit ajorsarteriarlugit PAN AM-imukarumaarpugut, naggasiilluni oqarpoq.