Maanna aalajangiunneqarpoq: Apriilip 24-anni qinersisoqassaaq

Apriilip 24-anni qinersisoqassasoq, Inatsisartunit aalajangerneqarpoq

Inatsisartut ullumikkut nalunaaqutaq 11.00 ataasiinnarmik oqaluuserisassaqarlutik katersuupput: Immikkut ittumik qinersisoqarnissaanut siunnersuut.

Naalakkersuisut siulittaasuata, Kim Kielsenip (S), sapaatip-akunnerani kingullermi ataasinngormat ikerinnakkut qinersisoqarnissaanik aalajangerniarluni nalunaaruteqarmat, apriilip 17-at aamma 24-at ulloritinneqarsinnaasutut oqaatigai.

Kisianni siunnersuummit inaarutaasumit apriilip 17-at peerneqarpoq. Inatsisartut qanoq sukkatigisumik katersorneqarnissaat qularnarnera pissutigalugu ullut taakku marluk taaneqarsimasut, Kim Kielsenip saqqummiussinermini oqaatigaa.

- Nunarujussuarmi avinngarusimasumi najugaqartiterpugut, aammalu ilaasortarpassuit Inatsisartuni ataatsimiinnissamut Nuummiissinnaanissaminnut ungasissumut angalasariaqartarput. Taamaattumik qaqugu suliassaq Inatsisartuni suliarineqarsinnaanersoq qularnaarneqareerpat aatsaat qinersinerup ullussaata aalajangerneqarnissaa kissaatigisimavara.

Qinersinermut inatsit malillugu qinigaaffik ukiuni sisamani sivisussuseqarpoq. Taamaattumik immikkut ittumik qinersititsiniaraanni nammineq inatsiliornissaq pisariaqarpoq.

Immikkut ittumik qinersinissamut nassuiaatit naapertorlugit ‘maannakkut politikkikkut inissisimaneq’ tunngavigineqarpoq.

Inatsisartut aasaanerani sulinngiffeqarneq sioqqullugu Inatsisartut inissinnissaat, Kim Kielsenip kissaatigalugu saqqummiussinermini itisilerpaa.

- Tamatumani Naalakkersuisut nutaat Naalakkersuisut 2019-mut aningaasanut inatsisissatut siunnersuummik, politikkimik imaqartumik, piareersaanissamut periarfissaqartinneqassapput, taamatullu ukioq manna Inatsisartut ukiaanerani ataatsimiinnerisa nalaanni siunnersuutit allat pingaaruteqartut suliarineqarnissaannut piareersalereernissamut periarfissaqassaaq.

- Aammattaaq isumaqarpunga Inatsisartunut qinersineq, qanoq pisoqaraluarpalluunniit pinngitsoorani ukioq manna ingerlanneqartussaq, nalinginnaasumik upernaakkut ataatsimiinnerup aallartinnissaa sioqqullugu politikkikkut sulinermut sunniutilereersimasoq. Naliliinera malillugu Inatsisartunut qinersinissaq aatsaat kingusinnerusukkut suaarutigineqaraluarpat, taava Inatsisartuni politikkikkut sulinermi qineqqusaarneq ersarippallaalissasoq ilimagineqarsinnaammat, tamannalu arlaannaataluunniit iluaqutiginavianngilaa.

Powered by Labrador CMS