Maalaaruteqartarfimmit KNI pillugu allaaserisaq isornartorsiorneqarpoq

Danmarkimi tusagassiutinut maalaaruteqartarfimmut KNI maalaaruteqarnermini ilalalerneqarpoq. Maalaarut tunniunneqarpoq Berlingske Busines nittartakkamini allaaserinnimmat KNImi siulersuisut siulittaasuat Niels Thomsen KNImi qullersat taarserarneqarnerannut atatillugu nammineq qaffasissumik atorfininniarsarsivoq. Tamannali piviusumik tunngaveqanngitsoq Danmarkimi tusagassiutit pillugit maalaaruteqartarfik naliliivoq.

Berlingske Business siorna decemberip qaammataani aallaaserisaqarpoq qulequtserlugu ’Qullersap soraarsitsisua atorfimmut imminut piukkuppoq’. Tassani Berlingskep tusarfinnit tutsuiginartunit arlalinnit tusarsimanerarpaa Niels Thomsen KNImi qaffasissumik atorfininniarsarisoq. Tamanna Niels Thomsenip nammineq ilumuunnginnerarpaa, taamaattorli Berlingske Business aalajangerpoq allaaserisaq saqqummiunniarlugu.

Naapertuutinngilaq
KNI Danmarkimi tusagassiutit pillugit maalaaruteqartarfimmut maalaaruteqarpoq taannalu maanna suliarineqareersimalerpoq.

Suliffeqarfissuup pisortaanerisimasaata tunuarneranut tunngatillugu taasinerit agguataarneqarnerannut tunngatillugu Berlingske paatsuuganartunik paasissutissiisimanera tusagassiornermik maalaartarfiup isornartorsiorpaa, kikkunnullu tamanut Berlinske-p saqqummiussinnginnermini paasissutissanik uppernarsaaseeqqaarsimannginnera aamma isornartorsiorlugu, paasiniaaqqaarsimagunimmi kukkuneq pinngitsoorsimasinnaagaluarmassuk. Eqqortorlu unaavoq, soraarsitsinermut taarsiullugu tunuarnermi aaqqiisoqarnissaanik siulersuisunut ilaasortat arfinillit isuma-qataallutik taasipput, marlullu akerliullutik taasillutik. Siulersuisut ataatsimiinneranni siulersui-sunut ilaasortat arfineq pingasut ataatsimeeqataapput, ippassaammammi ilaasortap ataatsip tunuarnini nalunaarutiginikuummagu. Taamaattumik siulersuisuni suliffeqarfissuup pisortaanera-nik “soraarsitsillutik” tallimat amerlanerussuteqarlutik sisamallu akerliullutik taasinerinik aviisip allaaserisaa eqqunngilaq.

Eqqissiallappoq
Maalaaruteqartarfiup aalajangernera Niels Thomsenip aamma eqqissiallaatigaa.

- Danmark-imi tusagassiornermik maalaartarfip naatsorsuutigisatsitut aalajangiinera assorsuaq nuannaarutigaara. Uannut KNI A/S-imullu suliamut tunngatillugu eqqortumik paasissutissiisoqarnissaa assut pingaaruteqarsimavoq.

Tusagassiornermik maalaartarfiup aalajangiinermigut Berlinske allaaserisamini tunngave-qarani paasissutissiisimanera naqissuserpaa. Piviusorsiunngitsumik allaaserinnittoqarpoq, kiisalu isumapalaaqarluni eqqunngitsumik paasissutissiisoqarluni, kiisalu KNI-mi siulersui-sut uppernassusaannik innarliiniaalluni apeqqusiisoqaraluarluni, Niels Thomsen oqarpoq.

Berlingske peqquneqarpoq tusagassiutinut maalaaruteqartarfiup aalajangiinerata eqikkarneranik saqqummiinissamik.

KNI pillugu allaaserisat uani atuakkit