Maajip aallaqqaataani Narsami upernaaq takkuppoq

Nunarsuaq tamakkerlugu sulisartut ulluat malunnartinniarlugu, Narsami sulisartut peqatigiiffiat illoqarfimmi arpatitsivoq, alussaammillu naatsiiaamik tigummiaatigaluni arpatitsisoqarluni.

Taakkua kingorna katersortarfimmi ornigarneqarluartumik kaffillertoqarpoq, tassani sulisartut peqatiiffiata siulittaasua Helga Gotfredsen sulisartut ulluanni oqalugiaateqarluni.

Najuuttut tamaasa pilluaqqoriarlugit ilaatigut oqarpoq:

- Sulisartut Nunarput napatippaat, taamaammat piumassuseqarlutalu aalajaatsuusariaqarpugut. Narsami innuttaasut malunnaatilimmik ikileriaateqarsimapput, suliffissarsiortut pisortanit ikiorsiissutaannik pisartagaqartut suliffissaannik neqeroorfigisinnaasariaqarpavut. Sanaartornermulli tunngatilligu aserfallatsaaligassarpassuupput, illoqarfimmilu inissianik nutaanik pisariaqartitsivoq, kollegia nutaamik kiisalu meeqqerivimmik nutaamik pisariaqartitsisoqarluni. Sanaartukkat pisoqalereersut aserfallatsaaleqattaaginnarnagit nutaamik sanaartortitsineq pitsaanerujuussaaq. Suliffeqarfiit namminersortut arlallit aalajaatsuunngillat, tamannalu pissutigalugu kommuni peqataanerusariaqarpoq suliffisaaleqisut suliaqartikkumallugit, taanna oqarpoq.

Aatsitassarsiornermilu akit appariartuinnarnerisa kingunerisaanik aatsitassalerineq ingerlanerlunera, ilorraap tungaanut aallaqqinnissaa taassuma neriuutigaa.

Maajillu aallaqqaataa tamanit atorluarneqarnissaa neriuutigalugu oqaatigaa. Aammalu ulloq taanna kiisami upernaarsiorluarput.