kulturi

Hans Lyngep Aningaasaateqarfia qiimmassaatinik tunniussissaaq

Kalaallit Nunaanni Danmarkimilu kulturikkut ingerlataqartut Hans Lyngep Aningaasaateqarfianit qiimmassaatinik tunniussisoqassaaq

Nunatsinni Danmarkimilu kulturikkut ingerlataqartut Hans Lyngep Aningaasaateqarfianit qiimmassaatissaannik tunineqassapput tallimanngorpat.

Københavnimi Kalaallit Illuutaanni aaqqissuussineq toqqaannartumik Skypekkut aallakaatinneqassaaq. Qaaqqusat saniatigut inuit aamma aaqqissuussinermut peqataasinnaapput. Danmarkip nalunaaqutaa malillugu aaqqissuussineq nalunaaqutaq 17.00 aallartissaaq, Nuummit malinnaaffigineqarsinnaalluni.

Aaqqissuussinermi ataqqinaammut marluk toqqarneqassapput, aamma nipilersortoqarumaarpoq.

Eqqumiitsuliorneq
Legatit siunnersuutigineqarsinnaanngillat, Aningaasaateqarfimmili siulersuisuni ilaasortaasut kikkut aningaasanik tunisissanersut aalajangertarpaat, Hans Lyngep Aningaasaateqarfia ilisimatitsivoq.

Hans Lyngep Aningaasaateqarfia suliffeqarfittut ingerlasuunngilaq, 1989-imilu pilersinneqarluni. Kulturikkut suliaqartut tapersersorneqarnissaat anguniarlugu aningaasanik tunissuteqartarluni.

Siulersuisuni ilaasortaapput Inge Lynge (siulittaasoq), Niels Henrik Lynge (siulittaasup tullia), Nauja Lynge, Jessie Kleemann, Kaj Kleist, Birgit Kleist Pedersen aamma Tove Søvndahl Gant.

Powered by Labrador CMS