Lund Olsenip innarluutilinnut inatsimmi nutaaliornerit maqaasivai

Inatsisartuni ilaasortaq Martha Lund Olsen (S) Naalakkersuisut innarluutilinnut inatsissatut siunnersuutaat, ullumi ataasinngornermi siullermeerneqartussaq, atuaramiuk pakatsisimaqaaq. Innuttaasunut innarluuteqartunut Inatsisissami nutaaliornerit siunnerfiillu taassuma ujartorpai.

- Inatsisassaq annertunerusumik nutaanik periuusissiassanik imaqanngilaq. Tamanna assut uggornarpoq, Martha Lund Olsen (S) tusagassiuutinut nalunaarummi allappoq.

Taanna isumaqarpoq, inatsissatut siunnersuut "Inatsisartut Peqqussutaat nr. 7. Novemberip 3. 1994-imeersoq Namminersornerusullutik Oqartussat Naluaarusiaat nr. 64 29. November 1994-imeersoq aammalu Namminersornerusut Nalunaarusiaat nr. 8 25. Juni 2004-imeersut kiisalu Inatsisartut Meeqqanut ikiuorsiinermut Inatsisaanninngaannersoq eqikkarlugit inatsisiliaasoq malunnarpoq", taassuma oqarneratuut.

Innarluutilinnut pitsanngoriaatit annikitsut

Innarluutillit ikiorserneqarnerinut nerisassiuunneqarnerinut aningaasaqarnerisalu oqilisaaffiginiarlugit qaffaalaarnerup saniatigut, pitsanngorsaavigineqarniaratillu aningaasanik amerlanerusunik immikkoortitsivigineqarsimannginnerat, Martha Lund Olsenip uggoraa. Aningaasat sinneri allaffissornermut atorneqassapput.

- Tamanna assut ugornarpoq ukiuni kingullerni pingaartumik Inooqat allallu Innarluuteqartut peqatigiiffiisa saqqummiuttagaat soorlu

tusaaneqaratit inatsisiliortoqarsimanera assut uggornarpoq, Martha Lund Olsen allappoq.

Najugaqatigiiffiliortitsinissaq taperserneqartoq

- Neriuutigisimangaluarpara amerlanerusunik ersarinnerusumillu pitsanngorsaasoqarnissaa, Naalakkersuisummi paaqqinnittarfinnik sanaartortoqassatillugu tapersiisarnermisut, innarluutilinnut najugaqatigiiffinnik sanaartortitsinissamut tapersiisariaqarluarput, Martha Lund Olsen innarluutillit najugaqarfinni tattoqilliortut tikkuarlugit, Sermitsiaq.AG-mut oqarpoq.

Inuillu innarluutillit suliffeqartut SIK-p akissarsiarititaanut naleqquttumik assersuutigaluguli sapaatip-akunneranut nalunaaquttap akunneri 20 tiimit sulisarnissaat pillugu, Naalakkersuisut siunertaqannginnerat maqaasivaa. Taamaasiornikkummi inuiaqatigiinnut naligiinnerusumik akuutinneqalissangaluarput.

Pisariaqartitat aallaavigalugit naliliineq

Martha Lund Olsen aamma isumaqarpoq, innarluutillit pisariaqartitaat minnerpaamik ukiumoortumik nalilersuiffigineqartarnissaat, inatsisissatummi siunnersuummi nutaami allassimavoq, pisariaqartitsineq annertusippat aatsaat nalilersorneqassasut. Sisimiuni innarluutilinnut sullissivittaami tamanna ingerlanneqartassaaq.

- Illoqarfinni nunaqarfinnilu innarluutillit nalilersorneqarnissaannut ilisimasalinnik tamarmik sulisoqanngillat, meeqqallu innarluutillit nalilersorneqarnissaat qularutigineqarpat, sukkanerusumik misissuinerup ingerlanneqarnissaa periarfissaasariaqaraluarpoq, Martha Lund Olsen oqarpoq.

Unammilligassarpassuit

Taanna erseqqissaavoq, Inooqat 2014-15 sineriammi angalanermini meeqqat innarluutillit nalilersorneqarnissaat misissorneqarnissaallu ajornartorsiutigineqaangatsiartoq.

- Neriunaraluarami ukiut 23-it matuma siorna Inatsisiliaq manna periarfissaq atorlugu Naalakkersuisut pitsaasumik ersarissumillu siunnerfeqarlutik saqqummiussisimanissaat, Martha Lund Olsen oqarpoq.