Louis Elisasen suli ujaaraat

Helikopteri, umiarsuit angallatillu atorlugit Louis Elisasenip Nanortalimmeersup ujaarineqarnera maannamut suli kinguneqanngilaq. Politit umiarsuullu nakkutilliissutip Hvidbjørnenip ujaasinertik nangippaat.

Louis Elisasenip ujaarineqarnera pingasunngornermi ullaakkut aallartippoq umiatsiaaqqaminik Tasermiunukareerluni tikinngitsoormat. Umiatsiaaraa inuttaqanngitsoq Tasermiuni nassaarineqareerpoq.

- Politiit angallataat Sisak III pingasunngornermi taarsimmat Nanortalimmukarpoq. Umiarsuaq nakkutilliissut Hvidbjørnen unnuaq naallugu ujaasigaluarpoq kinguneqanngitsumik, Qaqortumi politiiniit Sîvalêrak’ Terkildsen Sermitsiaq.AG-mut ilisimatitsivoq.

Sisak IIIp ujaaseqataanini nangeqqereerpaa ujaasiffimmili nittaannera pissutigalugu qinerfiluttoq oqaatigineqarpoq.

Louis Elisasen 64-nik ukioqarpoq tuattuunanilu nerinnattuunani 155-160 centimeterisut angitigaluni. Qernertunik naatsunik nujaqarpoq atisaraalu atallaaq puttasinnaasoq tungujortumik qasersumillu qalipaatilik. Qernertumik nasaqarpoq gummersuillu aappaluartut/qernertut atorlugit.

Inuit Louis Elisasenip sumiinneranik ilisimannittut imaluunniit ujaasinermi iluaqutaasinnaasunik paasissutissaatillit politiinut saaffiginneqquneqarput. Aamma Nanortallip Tasermiullu akornanni angalasut alaatsinaaqqissaaqquneqarput.

Nanortalimmi politiit oqarasuaatigaat 701123.