Lottomik eqquillutik millionærinngortut toqqissisimasumik sinaakkusiipput

Tasiiliamiu 5 millionit koruunit sinnerlugit eqqueqqammerpoq. Ukiut arfinillit matuma siorna Larsine aamma Jakob Storch Qeqertarsuarmeersut millioninik eqquipput.

Jakob Storch nulianilu Larsine lottomi eqquinerminni angallammut illumullu akissaqalersimapput

Lottomi eqqukkat millionit pitsaanerpaamik qanoq atorneqartarpat? Tasiilami innuttaasoq tallimanngormat 5,4 millionit koruuninik eqquinermi kingorna imminut taamatut aperisimassaaq.

Larsine aamma Jakob Storch Qeqertarsuarmeersut ukiut arfinillit matuma siorna 7,8 millionit koruuninik eqquigamik, nutaamik illutaarnissaq takorluugaavoq.

AG taama allaaserisaqarpoq.

Eqquinngikkallaramik aningaasaqarniarnerat ilungersunarpoq, ineqarnermullu akiliiniarneq ajornartorsiutaalluni.

Kisianni eqquinerup kingorna aappariit illoqarfimmi sanasoq namminersortoq illumik nutaarluinnarmik nutaaliaasumillu sanatippaat. Taassuma saniatigut angallat sukkasuuliaq, umiatsiaaraq poca, qamuteralaat Vikingit, guitarit marluk, pattagiaasaq, pattagiarlu kallerup innitortoq aappariit pisiaraat.

- Maannakkut nammineq illutsinni najuaqarpugut, illumullu attartornermut akiliinissaq ernumassutigineq ajorparput. Tamannalu uagutsinnut toqqissisimanarpoq. Ilaqutariillu maanna illutsinni nutaami inissaqarluarluta ataatsimoorsinnaalernerput nuannaarutigaarput, Larsine Storch AG-mut oqarpoq.

Iluatsitsillutik lottomik eqquisut pillugit oqaluttuaq tamaat AG-mi saqqummertumi atuarsinnaavat:

Powered by Labrador CMS