peqqarmiisaarniarneq
Londonimi peqqarniisaarniarluni saassussisoqartoq
Londonimi politiit inatsisartut ataatsimiittarfiata eqqaani pisoq, maanna peqqarniisaarniarluni saassussinertut suliaraat, tassani inuit arlallit ikilerneqarsimapput
Pingasunngornermi ualikkut tuluit inatsisartuisa ataatsimiittarfiata eqqaani Londonimi eqqartoqarpaluttoq tusaaneqarsinnaasimavoq, inuillu ikinnerpaamik marluk aallaaneqarsimapput. Nutaarsiassaqartitsivik Reuter tuluillu tusagassiorfii arlallit taama allapput.
Misissuinerup allatut pisoqarsimaneranik paasineqarnissaata tungaanut, pisoq peqqarniisaarniarluni saassussinertut suliarineqarpoq, Londonimi Metropolitan Police taama oqariartuuteqarput.
Sumiiffik politiinik sakkulisartunik ulikkaarpoq, takunnittut taama oqaluttuarput. Inatsisartut ataatsimiittarfiat tamarmi matoqqatinneqarpoq. Ilaatigullu isertoqarsinnaananilu anisoqarsinnaannginneranik tamanna isumaqarpoq.
Inuit arlallit ikilerneqarsimasut Londonimi inatsisartut ataatsimiittarfiata ungasinngisaani Westminister Bridgemi nalasut Reutersimit assiliisup takusimallugit oqaatigaa.
BBC naapertorlugu pisut assigiinngitsut marluupput, taakkulu ataatsikkut pisimapput.
Pisup aappaa Westminster Bridgemi pivoq, tassani biilertoq inunnik arlalinnik aporsinissamik siunertaqarluni ingerlaarsimavoq. BBC-mit assit takutippaat, biili taartoq sumiiffimmi ungalumut aporsimasoq.
Pisup aappaa inatsisartut isertarfianut qaninnerusumi pisimanerarneqarpoq. Tassani angutip aallaaneqannginnermini politeeq savimmik kapisisimavaa. Inatsisartut aqutsisoqarfimmi pisoqap David Lidingtonip oqaluttuaraa.
Ajoquserneqarsimasut qanoq-issusaat ilisimaneqanngilaq.
Ambulancet arlallit qulimiguullillu annaassiniaasartut tassani pisoqarfiusumiipput.
Tuluit Nunaanni premierministerip, Theresa Mayip, oqaaseqartartuata Reuters naapertorlugu naalaakkersuisut siulittaasuat ajunnginnerarpaa.