Piiaaffiit

London Mining Greenlandimi pisortaq nutaaq

General Nice Groupimi siulittaasoq London Mining Greenlandimi siulittaasunngoqqippoq. Kinamiut suliffeqarfissuata immikkoortortallip London Mining pigaa.

London Mining Greenland oqaluttuareriikkatsitut siorna aggustimi pinngitsaaliissummik atorunnaarsinneqarnissamik piumaffigineqarnermi kingorna, decembarimi atulerseqqinneqarpoq.

Inuussutissarsiornermik aqutsisoqarfimmi CVR-mut nalunaarsuutit sapaatip akunnerinik marlunnik kinguaattoorlutik nutarterneqarput. Taakkunanilu takuneqarsinnaavoq, atulerseqqinneqarneranut atatillugu pisortaq taarserneqarsimavoq.

Atuaruk: London Mining Greenland aallarteqqittoq

Suliffeqarfissuarmi siulittaasoq uteqqittoq
Jianzhen Jenny Yang maannamut pisortaasimasoq, Zhenfa Wangimit taarserneqarsimavoq, taannalu aamma siulersuisunut ilaasortanngorpoq.

Cai Sui Xin siulersuisunut siulittaasunngoqqippoq, taanna aamma suliffeqarfissuaq immikkoortortalik General Nice Group tamaat siulittaasuuffigaa, taassumalu immikkoortortani aqqutigalugu London Mining Greenland pigaa.

Atuaruk: Ingerlatseqatigiiffik Isuani piginneqataasoq akiliisinnaajunnaartoq

Naatsorsuutit kingusinaartut
London Mining Greenland aggustip 16-anni Inuussutissarsiornermut aqutsisoqarfimmit pinngitsaaliissummik atorunnaarsinneqarpoq, ingerlatseqatigiiffik ukiumut naatsorsuutinik piffissaq eqqorlugu nassiussisimannginnera pissutaalluni.

Ingerlatseqatigiiffiup aallarteqqinnissaanut ukiumut naatsorsuutit saniatigut nammineq aningaasaatit naammannissaat piumasaqaataavoq. Tamannalu ingerlatseqatigiiffiup aningaasaleeqqinnissaanik pisariaqartitsisimavoq.

Atuaruk: Kinamiut London Mining Greenland pigilerpaat

London Miningimit pisisut
London Mining Plc akiliisinnaajunnaarnerata kingorna, London Mining Greenland aamma Isuani saviminissamik piiaaffimmut akuersissut General Nice Groupip tiguai.

London Mining Greenlandimi siulersuisuni siulittaasuusimasoq, Graeme Hossie siulersuisuni ilaasortatut ingerlaqqippoq. Taanna maanna siulersuisuniikkunnaarpoq.

Powered by Labrador CMS