sunniuneqarneq
Løkke: Politiinut illersornissamullu sunniuteqalissaasi
Nunanit Avannarlernit Folketingimut ilaasortaq illersornissamut aamma politiinut isumaqatigiissusiornermut atatillugu tusaarneqarsinnaanngorlugit Lars Løkke Rasmussen ammaassivoq. Taamaattorli isumaqatigiissusiornermut peqataasassanngillat.
Aaja Chemnitz Larsen (IA) Folketingip oqaluttarfianit arlaleriarluni piumasaqartarpoq: Isumaqatigiissusiornernut annertuunut Kalaallit Nunaannut tunngassuteqartunut sunniuteqaqataarusuppugut.
Tamanna illersornissamut politiinullu isumaqatigiissusiornernut ingammik tunngavoq.
Isumaqatigiissusioqataassanngitsut
Kalaallit tusaaneqarnerunissaanut statsminister Lars Løkke Rasmussen maanna ammaassivoq.
- Nunanit Avannarlernit ilaasortaatitat oqaloqatigineqartarnissaannut ministerikka ilitsersornikuuakka, taamaalilluni Nunanit Avannarlernut immikkut tunngassutillit suliagut tamaasa ilisimatitsissutigineqartarniassammata, taanna Sermitsiaq.AG-mut oqarpoq.
Tamatuma saniatigut qanoq annertutigisumik iliuuseqarnissani killeqartoq oqaatigaa.
- Nunanit Avannarlernit ilaasortaatitat uani isumaqatigiissusioqataanissaat maanna takusinnaanngikkallarpara. Tamanna ammasumik oqaatigisariaqarpara, taama oqarpoq.
Issittoq naak siulianit illersornissamut isumaqatigiissummut pingaaruteqarnerugaluartoq, amerlasoorpassuit Kalaallit Nunaannut imaluunniit Savalimmiunut tunngassuteqartannginneranut tamatumunnga pissutaavoq.
- Una isumaqatigiissut immikkut kalaallinut imaluunniit savalimmiormiunut tunngasut sinnerujussuarlugit imaqarpoq, Lars Løkke Rasmussen (V) oqarpoq.
Aningaasanut inatsimmut sunniuteqarneq
Kingullermik aningaasanut inatsimmut isumaqatigiinniartoqarnerani Aaja Chemnitz Larsen (IA) inerneranut sunniuteqarpoq, naak uani isumaqatigiissusiornermut ilaanngikkaluarluni.
Nunanit Avannarlernit ilaasortaatitat siusissukkut tusaaneqarneranit tamanna pivoq, naak kingorna isumaqatiginninniarnernut peqataanngikkaluarlutik.
Aningaasanut inatsisissamut isumaqatiginninniutigineqartussamut tamanna aamma piumaartoq, Lars Løkke Rasmussen (V) naqissusiivoq.
- Piumasaqaataasumik Nunanit Avannarlernit ilaasortat oqaloqatigineqartarnerat ileqqunngortinnikuuarput.
Siunissamilu illersornissamut politiinullu isumaqatigiissutinut annertuunut taamatut iliortarneq atorniarpaa.
- Assersuutigalugu illersornissaq oqallisigitillugu assingusumik iliornissaq takorloorsinnaavara, statsministeri naqissusiivoq.