Løkkep tunngaviusumik inatsit pillugu Kielsen oqaloqatiginiarpaa

Lars Løkke Rasmussenip (V) ullumi aqagulu Kim Kielsen aamma savalimmiormiut lagmandiat Aksel V. Johannesen naalagaaffeqatigiinneq pillugu Christiansømi ataatsimiilerunik, tunngaviusumik inatsimmut isumalioqatigiissitap sulinera ilaatigut oqaluuserineqartussat ilagaat.

Tamanna sivisuumik apersuinermit atuarneqarsinnaavoq, taanna aqagu AG-mi saqqummertussami eqqartorneqarluarpoq.

Tassami tunngaviusumik inatsisissaq namminiilivinnermut tunngasoq, imaluunniit tunngaviusumik inatsit siullermik Danmarkimi inatsit tunngaviusut ataanni atoqqaartussamik suliaqartoqarnersoq, Lars Løkke Rasmussenimut (V) paasinaqqissaanngilaq.

Aamma atuaruk: Løkke: Tunngaviusumik inatsisissaq atuutsilerneqarpat bloktilskudi peerneqassaaq

- Naalagaaffeqatigiit ataatsimiinnissarput qilanaareqaara, tassanilu pisussat sorpiaanersut sumik anguniagaqarluni aallartinneqarnersut piffissaritinneqartullu suunersut Kim Kielsenip paasinarsitikkumaarai neriuutigaara. Kalaallit oqallinnerannit paasisinnaasattut arlariinnik aallartitsisoqarsimavoq, Lars Løkke Rasmussen (V) apersorneqarluni oqarpoq.

Aamma atuaruk: Tunngaviusumik inatsimmut taasititsinissamik pilersaaruteqartoqanngitsoq

Apeqqut aalangiisumik sunniuteqarsinnaavoq, tunngaviusumik inatsit namminiilivinnermut kisimi tunngasoq, Kalaallit Nunaannut naalagaaffimmit tapiissutit pisarunnaarneranik kinguneqarsinnaammat.

AG-p unnugu saqqummertussap ajornartorsiut tamanna allaaserisanik arlalinnik eqqartuiffigaa.