Dokumentation
Løkkep 1. klassimi angalanermini billetsit akii utertissanngilai
Ministeriunerusimasup Lars Løkke Rasmussenip, Venstre, ullumi angalanermut bilagit tamaasa saqqummiuppai. Silap pissusianik ingerlatsivimmi siulittaasutut angalasarsimavoq
Venstre-t aamma silap pissusianik ingerlatsiviup Global Green Growth Institute-p, GGGI, siulittaasuata Lars Løkke Rasmussenip peqqissimissutigalugulu ajuusaarutigigaluarlugu aningaasanik ikiorsiissutinik 1. klassimi timmisartumik angalasarsimanini, aningaasat utertinnianngilai.
Taamatut Lars Løkke Ramussen oqarpoq sapaatiummat Københavnimi tusagassiortunik katersortitsinermini, tassani GGGI-mi siulittaasutut angalasarnerminit bilagit 206-inik quppernillit tusagassiortunut agguaallugit.
– GGGI-mit piumaffigineqarsimanngilanga aningaasat utertissagikka. Pisut pereerput allanngortinneqarsinnaanatillu, Lars Løkke Rasmussen oqarpoq.
GGGI ukioq manna aalajangiivoq siulittaasoq taamaallaat business class-imi angalasinnaasoq, 1. klassimi angalasarunnaarluni. Lars Løkke aperineqarami billetsit assigiinngitsut taakkua nikingassutaat nammineerluni akilerumanerai Lars Løkke itigartitseqqippoq.
– Isumaqarpunga ingerlatsivimmi tassani suliarisimasakka naammaginartuusut, Lars Løkke Rasmussen oqarpoq.
– Utoqqatsersimavunga qulingiluariarlunga 1. klassimi tamakkiisumik ilaannakortumilluunniit angalasarsimanikka, taanna akivoq.
Lars Løkkep oqaatigiumanngilaa kiap malittarisassat allanngortinniarsimanerai taamaasilluni siulittaasoq 1. klassimi angalasinnaajunaarsillugu.
– Angalanermut malittarisassat allanngortinneqarsimapput pisortatut tullerisannik Bob Dawsonimik oqaloqateqarnikkut, Lars Løkke oqarpoq.
Venstret siulittaasuata Lars Løkke Rasmussenip silap pissusianik ingerlatsivimmi Global Green Growth Institute-mi (GGGI), nunani piitsuni ineriartortitsinissamut qallunaat akileraartartuinit 90 millioner koruuninik tapiiffigineqarsimasumi, siulittaasutut 15-eriarluni angalanermini 1 million koruunit sinnerlugit atorsimavai.
770.000 koruunit timmisartumi billetsinut atorneqarsimapput, tassa agguaqatigiissillugu billetsi ataaseq 51.000 koruuneqarsimalluni.
First Class timmisartumi inissiat nuimanersaraat nammineq siniffeqarsinnaasoq pitsaanerpaamillu kiffartuussivigineqartoq. Aningaasanik ikiorsiissutinik akisoorsuarmik nuimasuumillu angalanerit Christiansborgimi arlalinnit isornartorsiorneqarsimavoq.