Lodtrækning: Aajuku GM-mut puljet

GM-mi ingerlalluartussatut ilimagisaasut B-67 Nuummeersut aamma G-44 Qeqertarsuarmeersoq puljeqatigiittussaajunnaarput GM-imut puljenut makitsisoqarmat. Puljenut agguataarluartoqartoq GBU-miit nalunaarutigineqarpoq.

Siorna pissartaasut B-67 Nuummeersut puljeqatigisussanngorpaat I-69 Ilulissaneersoq, K-33 Qaqortumeersoq aamma FC Malamuk Uummannameersoq.

Puljep aappaaniipput G-44 Qeqertarsuaq, NÛK Nuuk, K-64 Kuummiut aamma Eqaluk 54 Tasiusaq.

- Takusinnaasakka malillugit puljenut naligiipajaartumik agguataartoqarpoq, GBU-mi siulittaasup tullia John Thorsen Sermitsiaq.AG-mut oqarpoq.

B-67 Nuummeersoq ukiut pingasut kingulliit finalemut annguttartoq siornalu pissartaasoq G-44-mut Qeqertarsuarmeersumut unamminerni aallarniutaasuni unammissanngilaq.

Tupaallaataasinnaasut
G-44 siorna bronzennappoq siornaallu pissanganartumik straffeqattaareerlutik pissartanngorput B-67 finalemi ajugaaffigalugu. Taakku ukiormanna ingerlalluaqqinnissaat ilimagineqarpoq.

Iligiit arlallit tupaallatsitsisinnaasutut isigineqarput. Tassaapput NÛK Nuummeersoq ukiuni arlalinni GM-ip naggataarneqarnerani peqataasimanngitsoq. I-69 Ilulissaneersoq aamma ukiut arlalissuit angutit pissartanngorniunnerisa naggataarneqarnerani peqataanngilaq. Nagdlúnguak arsartumik unioqqutitsisumik atuinini pillugu peqataasussaajunnaarmat I-69 peqataasussanngorpoq.

K-33 2003-mi nammineq arsaaffimini pissartanngorpoq ukiunili arlalinngortuni pikkorinnerit akornanniissimanani. Taakku aaqqissuisutut toqqaannartumik anngupput.

- Aamma puigussanngilagut Eqaluk 54 Tasiusameersut ukiut kingulliit angusarissaartartut. FC Malamuk aamma peqataalluarsinnaasutut isikkoqarpoq, John Thorsen oqarpoq.

Arsaannermi GM Qaqortumi ingerlanneqassaaq sapaatip akunnera 33 aamma 34. Unamminerit KNR-TV-kkut aallakaatinneqassapput.

Pulje 1
G-44, Qeqertarsuaq
NÛK, Nuuk
K-64, Kuummiut
Eqaluk 54, Tasiusaq

Pulje 2
I-69, Ilulissat
K-33, Qaqortoq
B-67, Nuuk
FC Malamuk, Uummannaq