Aappaluttoq
LNS-ip rubininik piiaaffik annaassinnaagaa
Immaqali Norgemiut suliffeqarfissuata LNS-ip, piiaaffimmut annertuumik aningaasaliissuteqareersimasup, piiaaffik annaassinnaavaa
Suliffeqarfik True North Gems Greenland akiliisinnaajunnaartutut nalunaarutigineqarnissaminik qinnuteqarsimavoq, aningaasanik pisariaqartinneqartunik nunani tamalaani arlalippassuariarluni pissarsiniaraluareersimalluni.
Taamatut nalunaaruteqarpoq Norgemiut suliffeqarfissuat Leonhard Nilsen & Sønner AS (LNS), suliffeqarfiup 27 procentianik piginneqataasoq. LNS naapertorlugu ingerlatsivik Rubinisiorfimmut Aappaluttumut, Nuummit 200 kilometerinik kujasissusilimmiittumut, annertuumik aningaasaliissuteqarsimavoq.
Piiaaffimmi akuiaavik sananeqareerpoq, sulisut najugaqarfissaat piareersimavoq attaveqarfiillu allat tamarmik sananeqareersimallutik. Taamaasilluni tunisassiorneq aallarteriaannanngorsimavoq.
Atuaruk: Akiliisinnaajunnaarnerup kingorna: Nutaanik aningaasaliisussanik pissarsiniarsarisut
Aningaasat pisariaqartinneqartut amigaataasut
LNS nalunaarpoq maanna misissuleritsik suliffeqarfik aaqqissuuteqqinneqarsinnaanersoq aningaasanillu pisariaqartitanik nassaartoqarsinnaanersoq.
– Upperaarput aningaaseriviit, aningaasaliisut aammalu Kalaallit Nunaanni ingerlatsisut, soorlu Greenland Venture, peqatigalugit rubinisiorfik annaassinnaagipput piffissallu sivikitsup iluani ingerlatilersinnaallugu, LNS tusagassiorfinnut nalunaarutikkut paasissutissiivoq.
Atuaruk: Rubininik piiaaffik aallartinnissaminut millionilinnik amigaateqarpoq
Iluanaarutaasussaq
LNS-ip pisortaa Frode Nilsen Sermitsiamut itisiliivoq:
– Tassami rubinisiorfimmut aningaasarpassuarnik aningaasaliissuteqarsimavugut. Taamaattumillu aallartinniassammat aningaasaliissuteqarnissarput isumaliutigaarput - Isumaqarluinnarpugut piffissaq ungasinnerusoq isigalugu piiaaffik iluanaarutaallualersinnaasoq. Aningaasaliisullu arlallit maanna oqaloqatigaavut aammallu Greenland Venture suleqatigilluarlugu. Alloriarneq tulleq tassaassaaq aningaasalersornerata inissinneqarnissaa, Frode Nilsen oqarpoq, oqaatigiumanngilaali suliffeqarfiup kikkut isumaqatigiinniuteqarfiginerai.
Allaaserisaq tamaat Sermitsiami atuaruk, taanna ullumi pisiniarfinni pisiarisinnaalerpat. Aviisi uani aamma pisiarinissaanut periarfissaqarputit: