Maratonip affaa
Liza LIllebæltimi maratonip affaanut arpannermi bronze-nappoq
Maratonip affaanut DM-eqarenermi Liza Tuperna Itzchaky bronze-nappoq inersimasunilu holdikkaarnermi sølvinnalluni. Aali astma-mut katsorsartilluni
´Ilaanneeriarluni nuannaarnermik qiasoqartarpoq - piffissami kingullermi timikkut unammilligassat kingorna 1.27.38 atorlugit apuukkama pilluaqaanga. Tassuuna eqqaasinneqarpunga sooq arpattarnerlunga - sapinngisara tamaat timima unammillerneranik nuannarinninneq - arpannermik nuannarinninneq. Ullumikkut maratonip affaanut DM-imi peqatigisanni ataasiakkaranermi bronze-nappunga, katillugillu normu 16-inngorlunga, inersimasunilu holdikkaarnermi sølvinnallunga Valborg aamma Kerstin peqatilugit (Kalaallit Nunaat, Savalimmiut Sverigelu Sparta-mi arpattartoqarput)´.
Taamatut arfininngormat facebook-imini allappoq Liza Tuperna Itzchaky, Lillebælt Halvmaration-ip, arfininngormat maajip 3-anni 11.000-nik peqataaffigineqarluni ingerlanneqartup, kingorna medalje-nik agguaassinerup kinguninngula.
– Nuannaaqaanga.
Tassami maratonip affaanut sukkanerpaaffini 44 sekundinik pitsanngoriartippaa, arpaffimmi Kalaallit Nunaata avataani arpattarnermini qattunerasaarnerpaami.
– Apaffik anorlingaatsisarsimavoq, piffissarlu atugara naammagisimaaginnarsinnaavarra marlunngormat astma-mik katsorsartilernera pissutigalugu anersaartornikkut unammilligassaqarama. Anersaartuutikka ippinnarput, allaat timiga uninngatiinnaraluarlugu, arpassinnaalluarpungali sivisuvallaamik tamaviaarneq ajoruma.
– Ippassarlu arpannerma takutippaa qasusuilliartortunga. Sæsonimi suli anguniarpara siorna sukkanerpaaffimma 1.24.17 tiimit qaangernissaa.