Liverpoolimi Fab Four nutaap City-kkut suli ajorsartinneqarsimanngitsut ajorsartippaat

Manchester City-p Arsenalikkut sæsoni 2003/2004-imi unamminerni 38-ni ajorsanngiivillutik pissartanngornerisa ilaariaraluarnerannik sinnattuat, sapaatiummat Liverpoolimmit aserorneqarpoq.

Liverpoolikkut saassussisartui arsarluaqisut Manchester City-p illersuiniarnermikkut kukkussutaannik pillarlugit hjemmabanerlutik 4-3-mik ajugaaffigaat.

Liverpoolikkut aallartilluaqaat, tassani Manchester City-kkut unammisartui arsallaqqikkaluaqisut sakkortuumik ilungersortinneqarput.

Unamminermi minutsit qulingiluat qaangiuttut, saassussisartuni Coutinhop paarlattaa, Alex Oxlade-Chamberlain, saassussilluni 20 meteriniit arsaq napparutip ungasinnerup tungaagut naqqatigut isummillugu isertippaa.

Isertitsineq Liverpoolimut oqiliallaataavoq, Manachester City-kkulli arsamik aqutsinerulerlutik.

Taamaakkaluartoq qaqutikkuinnaq annertuumik periarfissaqalertarsimapput, tassa muminnissamut minutsit tallimaannanngortut Leroy Sane arsarnerlukkaluaqaluni piginnaasarsuani takutippaa.

Liverpoolimi backi Koe Gomez tunisinerliorpoq, Sane-lu arsaaffiup saamiatungaatigut arsamik pinnguarluni.

Isertitseriarnissamulli periarfissalussinnaasumiit taassuma arsaq sakkortuumik målit napparutaasa qaninnerpaakut isertippaa, tassani målinik illersuisoq Loris Karius iliuuserissaarpallaanngilaq.

Unammineq arlaleriarluni sukkasuumik ingerlanneqartarpoq, muminnerullu kingorna allanngoriaateqaratik taamatut ingerlaannarlutik, tassani Manchester City-kkut illersuisartui aammarlutik arsarnerlunnertik takuteqqippaat.

Minutsit 15-it qaangiuttut John Stones, Roboerto Firmino-mit qaangerneqarami pitsorluttutut isikkoqarpoq, kinguninnguatigulli arsaq kusanartumik måålinik illersuisoq qulaallugu målit napparutaatigut arsaq isertippaa.

City-kkulli illersuiniarnermikkut kukkussuteqartarnerat ingerlaannarpoq.

Minutsi qaangiuttoq Fernandinhop målimi tungaanni arsaq toqqaannartumik Liverpoolimi unammisartunut toqqaannartumik tunniuppaa, Sadio Mané-llu arsaq målit napparutaatigut isertippaa.

City-kkut kukkussutiminik aaqqiissuteqarnissaat ilimagingaanni, kukkuneruvoq. Målinimmi illersuisartoq Ederson Oxlade-Chamberlain-ip isertitsinerani takutitsilluarpallaanngikkaluarluni, tallini atorlugit aamma kukkussuteqarujussuartarsimavoq.

Arsap naqqatigut siumoorneqarnerani Ederson-ip arsaq pukkinaarlugu peeriaraluarpaa. Arsalu Mohamed Salah-imit tiguneqarpoq taassumalli måliniit 35-40 meterinit ungasitsigisumiit inissilluarlugu 4-1-mik siuartitsivoq.

Taamaasillutik Liverpoolimi saassussisartut sisamat tamarmiullutik isertitaqarput. Kina Coutinhop maqaasineqarneranik oqaluppa?

Unamminerup naammasinneqarnissaanut minutsit tallimaannanngortut taarsiisoq Bernardo Silva 2-4-mut isertitsivoq, unamminerulli sivitsorneqarnerani hjemmebanertunut illersuisut pissagalerluarlutik.

Ilkay Gündogan Liverpoolip måliisa saavanni inissaqartinneqarpallaarsimavoq. Taassuma arsaq sakissani atoriarlugu arsaq isertippaa målillu nikigassut 3-4-nngorluni.

Tamanna unamminerup sivitsuutaani kingullerni pingasuni pissagaffiuvoq, taamaattoq hjemmebanertut illersuilluarput, pikkunartumillu unammiffiusoq ajugaaffigalugu.

Liverpoolikkut ajugaarujussuarnertik nuannaarutiginerini City-mi sungiusaasup Pep Guardiola-p ligami tullertut inissisimasuniit pointinik 15-inik suli siuaqqanernertik saammarsaatigisariaqarpaa.

/ritzau/