Ilusilersuineq
Liss Stenderip qaaqqusaanini tulluusimaarutigaa
Kalaaleq ilusilersuisartoq martsip naanerani Reykjavikkimi 'DESIGNmarch'-imi saqqummersitsisoqarnissaani peqataassaaq
'DesignMarch' pequtinik ilusilersukkanik Islandimi ukiumoortumik saqqummersitsisarpoq. Suliffeqarfiit Islandimeersut kisimik peqataasaraluarput, Liss Stenderili Islandimiuunngitsuni siullersaalluni ilusilersukkani saqqummersittussanngorpai.
Saqqummersitsinissaq soqutigineqarluartartoq martsip 27-anit 30-at ilanngullugu Reykjavikkimi ingerlanneqassaaq. Tassani ilusilersuinermik soqutiginnittut tusagassiorfiillu nunanit allaneersut saqqummersitsineq malinnaaffigisarpaat. Takuniaasunut ilaassaaq suliffeqarfik nunarsuaq tamakkerlugu ilisimaneqartoq Calvin Klein.
Liss Stenderip inuk Designimi ingerlalluarnini pissutigalugu qaaqqusaanerminut pissutaatippaa.
- DesignMarchimut qaaqqusaanera tulluusimaarutigaara, nunani avannarlerneersunit maluginiarneqarsimallunga misigaanga. Islandimiuunngitsumik siullermeerluni saqqummiisussaanera atorluarniarpara, Liss Stender oqarpoq.
Pequtinik ilusilersuineq
Nunatsinni nunanilu allani inuk Designimi pequtinik ilusilersuisarnera nuannarineqarluarpoq. Pequtinik ilusilersuinermini kalaallit kulturiat saqqummersinniartarpaa nutarsaasarlunilu, tassani annoraamerngit, qisummik ilusilersuineq, marramit atortussiat, atisanik ilusilersuisarlunilu aamma allarpassuarnik ilusilersuisarpoq.
Ulluinnarni atortussani Liss Stender ilusilersuisarpoq, nunanilu allanut tunisassiornissaq siunissami anguniarlugu.
Kommuneqarfik Sermersuumit 2012-imi pilersitsillammattut tunineqarpoq. Kalaallit Nunaanni Danmarkimilu ukioq kingulleq suliai soqutigineqaleraluttuinnarput, maannakkullu Islandimit aamma soqutiginnittoqartalereerluni. Liss Stender Facebookimi quppernermini takussaasorujussuuvoq, aamma Reykjavikkimi, Parisimi Aalborgimilu saqqummersitsinerni mikinerusuni 2012-imi saqqummersitsisareerpoq. Saqqummersitsinerni anginerpaami Design Trade-mi Bellacenterimi Københavnimi ingerlanneqartumi peqataanikuuvoq ukioq kingulleq aggustimi.
DesignMarchimi saqqummersitsereeruni ilaatigut Epalimi, JosephJosephimi, iittalami, Marimekkomi, Gero Jensenimi kiisalu Alessimi saqqummersitsiumaarpoq.