Liisi Egede Hegelund kusanartumik nersornaaserneqartoq

Aallartitsisartoq Liisi Egede Hegelund Nuummi Inuk Hostelsimi ilisivinnut ilisassaaleqissaguni pinnersaatissatut naleqqutissaaq vikingit umiarsuaat, pingasunngormat Vestnorden Travel Awardimi nersornaatisiani.

Nersornaat siullerpaamik tunniunneqarpoq takornariaqarnermik nittarsaasarnermut Vestnorden Travel Martimut, ukioq manna Savalimmiuni ingerlanneqartumut, atatillugu.

Takornariartitsisartut Kalaallit Nunaanneersut, Savalimmiuneersut Islandimeersullu nersornaaserneqarput. Nersornaaserneqarnissamullu tunngavissasimapput piukkunneqartut nutaaliornermi, akisussaassusilittut aamma/imaluunniit atasinnaassutsimik malunnaateqarsimanissaat.

Aallussilluartoq

– Vestnorden Travel Award 2015 tunniunneqarpoq aallussilluartumut, Kalaallit Nunaanni illoqarfiit pingaarnersaata qeqqani pinngortitami alianaatsorsuarmi takornarianut ussannartumik pilersitsisimasumut. Kalaallit illulioriaasitoqaat nutaanngorlugu unnuisarfinngortillugit ataatsimiittarfinngortillugillu. Nuummiorpassuillu Liisi Egede Hegelundimut kaffisoriaasarput, aalajangiinermut tunngaviliillgami pisortaq Jákup Sverri Kass, Vagar Lufthavnimeesoq, oqarpoq.

Liisi Egede Hegelund nersornaat nammineq tigusinnaasimanngilaa Danmarkimiikkami, Sermersuumilu Inuussutissarsiornermut Siunnersuisoqatigiinni pisortap Ulla Lyngep aallartitsisoq sinnerlugu nersornaat tiguvaa.

Islandimi nersornaat tunniunneqarpoq takornarianut ussatsitsiniummut ´Into the Glacier´, taassuminngalu sanasuuvoq Siggi Skarphedinsson, tikeraallu tassani torsuusaliatigut sermeq Langjökull piviusorpalaartumik misigisaqarfigisinnaavaat. Savalimmiunilu nersornaaserneqarpoq takornariat umiarsuaat Nordlysid, taassuminngalu piginnittuuvoq Birger Enni.

Nersornaasiisalernissamik suliniuteqartuuvoq Carsten Elsted, nunani avannarlerni angalatitseqatigiiffinnut atugassiamik TTO Scandinaviamik saqqummersitsisartoq, ukiullu 20-ngajaat matuma siornatigut Danish Travel Awardimik pilersitsisoq.