Pituffik
Lidegaard neriulluarpoq: Aaqqiissutaasinnaasut amerlapput
Danmarkip nunanut allanut ministeria Martin Lidegaard USA-p nunanut allanut ministeria John Kerry ataatsimeeqatigereerlugu Pituffik pillugu suliaq isumalluarfigaa
Greenland Contractorsip Pituffimmi kiffartuussinissamut isumaqatigiissutip oktobarip 31-ani 2014-mi annaagaa tusalliunneqareersoq, kikkut tassunga akisussaasuunersut tusagassiuutinit, inuinnarnit politikkeriniillu paasiuminaatsinneqarpoq. Pisormi Kalaallit Nunaannut Naalagaaffeqatigiinnermullu eqquisuuvoq.
Nunanut allanut ministeri Martin Lidegaard, Radikale Venstre, KNR-imit sisamanngormat apersorneqarami oqarpoq 'illersornissamik isumaqatigiissutip USA-mut isumaqatigiinniutigineqaqqinniissaanik IA-p siunnersuutaa pisiusorsiortut isiginagu'.
Taamaattorli Danmarkip nunanut allanut ministeria Finansimit apersorneqarami oqarnera neriulluarnerorpaluppoq. Martin Lidegaardip USA-p nunanut allanut ministerianik John Kerrymik ataatsimeeqateqarnera danskit nutaarsiassaqartitsivianit malinnaaffigineqarpoq.
Ataatsimiinneq angusaqarfiusoq
- Isumaqatigiissut Air Forcemit attatiinnarneqassappat isumaqatigiissutigaarput Kalaallit Nunaata, Danmarkip aamma USA-p naammagisaanik angusaqartoqarnissaanik ataatsimiittoqassasoq nuannaarutigaara, Martin Lidegaard Finansimut oqarpoq.
- Atorfilittat ajornartorsiummik aaqqiiniarnissaat John Kerry piumasaqaateqarfigaara. Nunanut allanut ministeri inussiarnersuusoq suliamullu tusarnaarusuttuusoq malugaara. Ajornartorsiuteqartoq takusinnaavaa, Nunanut allanut ministeri oqarpoq nangillunilu:
- Aaqqiissutaasinnaasut amerlapput. Isumaqatigiissutigineqartuni isumaqatiginninniaqqittoqarsinnaavoq, aamma allanik periarfissanik ujartuisoqarsinnaavoq.
Exelis Servicesip Pituffimmi kiffartuussinissamut isumaqatigiissutaata attatiinnarneqarnissaa Government Accountability Officemit aalajangerneqarpoq. Isumaqatigiissut septembarip 30-anit atuutilissaaq ukiunilu arfineq marlunni tulliuttuni atuutissalluni.