Kalaallit Nunaanni Naatsorsueqqissaartarfik
Lethip soraarsinneqarsimaneranut nassuiaat nutaaq
Henrik Lethip Kalaallit Nunaanni Naatsorsueqqissaartarfiup siulersuisuinit, sooq soraarsitaasimaneranut, allatorluinnaq nassuiaat saqqummerpoq.
Aningaasaqarnermut Akileraartarnermullu Naalakkersuisoq, Aqqaluaq B. Egedep siullermik nassuiaatigaa, Henrik Leth Sulisitsisuni ilaasortaanera patsisaasoq. Tamanna AG aviisip allaaserisimasaa aallaavigalugu KNR paasissutissiivoq.
Naalakkersuisulli kingorna Qanoruumut nassuiaatigaa, Henrik Lethip suliffeqarfinnik soqutigisaaminik aporaatitsisinnaanera pissutaasoq, Henrik Leth-imi Polar Seafoodip siulersuisuuneranni siulittaasuuvoq.
Nassuiaat nutaaq
Allakkat 21. april ullulerneqarsimasut Sermitsiaq.AG-mit takusimasaani, Aqqaluaq B. Egedep Henrik Leth-imut soraarsitsinerminut ima nassuiaateqarpoq:
- Siulersuisut Naatsorsueqqissaartarfiup suliassaanut sanilliullugit ataatsimut nalilernerisigut Naalakkersuisut taama aalajangerput.
Aamma atuaruk: Naalakkersuisut Henrik Leth maannaannakkut soraarsikkaat
Suliffeqarfinnik soqutigisaminik aporaatitsisinnaanera tassani eqqaaneqanngilaq, Naalakkersuisulli kingorna tamanna pissutaanerarlugu.
Leth: - Oqaaseqassanngilanga
Henrik Leth-illu soraarsitaasimanini pillugu suli Sermitsiaq.AG-mut oqaaseqarfigerusunngilaa.
Henrik Lethip Kalaallit Nunaanni Naatsorsueqqissaartarfiup siulersuisuunerani ilaasortaasinnaajunnaarnera tupigusuutigineqarluni oqallisigineqarsimavoq, taannami ukiuni arfineq marlunni ilaasortaareersimavoq. Ukiunili kingullerni tallimani Polar Seafood-ip siulersuisuuneranni siulittaasuusimavoq, atorfilli maanna Kalaallit Nunaanni Naatsorsueqqissaartarfimmut akulerutsinneqarsinnaajunnaartoq.
Ukiut pingasukkaartut
Siulersuisuni ilaasortat ukiut pingasukkaarlugit toqqarneqartarput, Henrik Leth-ilu 2019 tungaanut ilaasortaasussaasimangaluarpoq.