Lennert-Sandgreen pisortatut nutaamik atorfittaarpoq

Qaasuitsup Kommuniani kommunalbestyrelsi tallimanngormat ataatsimiinnermini aalajangerpoq Lars Lennert-Sandgreen Qaasuitsup Kommuniani kommunaldirektøritut atorfinitsinniarlugu.
– Atorfinitsitsineq pivoq atorfinitsitsinermut ataatsimiititaliap inassuteqaataa tunngavigalugu, Qaasuitsup Kommuniani borgmesteri Ole Dorph, Siumut, oqarpoq.
53-inik ukiulik Lars Lennert-Sandgreen ukioq manna juunip aallaqqaataaniilli kommunaldirektøriugallartutut atorfeqarsimavoq, maannalu atorfimminut ingerlaannaq ikkuppoq.
Atuaruk "Ironman tupinnaannartoq: Taamaasioqqissaanga
Angut misilittagalik
Taanna 2012-imi Qaasuitsup Kommuniani inuussutissarsiornermi pisortatut atorfinippoq siusinnerusukkullu KNR-mi aamma Royal Greenlandimi pisortaasarsimalluni, taakkunani marlunni ukiuni arlalinni.
Tamatuma saniatigut Lennert-Sandgreen arlalinni siulersuisunut ilaasortaaffeqarpoq, ilaatigut Tele Greenlandimi tamatumalu saniatigut ironman ingerlattarlugu.
– Taamaasilluni kommunalbesktyrelsi kommunaldirektøreqalerpoq suliatigut inuttullu atituumik tunuliaqutalimmik, namminersortunit, minnerunngitsumilli pisortani, ilaatigut kommunini, qullersatut misilittagalimmik, Ole Dorph tusagassiorfinnut nalunaarummi allappoq.
Taanna nassuiaavoq kommunalbestyrelsip qularutiginngikkaa kommunalbestyrelsi kommunillu allattoqarfia missingersuutinut aalajangiinerillu kingunerisaannik aninggaasatigut kinguneqaatissanut annertuumik akisussaassuseqarnissaat qulakkeerneqartoq, kiisalu Qaasuitsup Kommuniani kommunip innuttaasunik inuussutissarsiortunillu sullissinerata ineriartornera sammineqassasoq.