USA-mi allaffeqarfik
Lektori: USA-mi allaffeqarfittaarniarneq namminiissutsimik takutitsineruvoq
- Kalaallit Nunaat nammineersinnaasoq Danmarkimut takutinneqarpoq, inuiaqatigiinnullu sapinngisat takutinniarneqarlutik, Ilisimatusarfimmi oqaluttuarisaanermi lektori Thorkild Kjærgaard oqarpoq
Namminersorlutik Oqartussat Washingtonimi allaffeqarfeqalernissaat aviisimi saqqummersartumi Kristelig Dagbladimi Aleqa Hammond isornartorsiorneqarpoq.
Namminersorlutik Oqartussat Washingtonimi allaffeqarfeqalerniarnera pillug Dansk Folkepartiminngaannit Søren Espersen nunanut allanut ministeri Martin Ledegaard isumasioqatiginiarlugu nalunaarfigaa.
Kristelig Dagblad ilaatigut allappoq, Namminersorlutik Oqartussat USA-p illoqarfiisa pingaarnersaanni allaffeqarfimmik ammaanissaa Aleqa Hammondimit kalaallinut sapinnginnermik takutitsiniarnerusoq oqaatigineqarpoq.
- Namminersornermut inatsimmi allaqqasoqarpoq nunanut allanut tunngasut ataatsimut suliarineqartassasut, taamaattumik allaffeqarfimmik ammaanissaq arlaatigut inatsimmut eqquutitsinerunngilaq, Namminersorlutik Oqartussammi Washington D.C-mi allaffeqarfimmik ammaaniarneq nammineerluni suliarineqarpoq. Allaffeqarfissami nammineerluni ingerlaniartoqassanngippat allaffeqarfik sumorpiaq atorneqassanersoq paasiuminaassaaq, Lars Hovbakke Sørensen Københavnip Universitetiani oqaluttuarisaanermi lektori Kristelig Dagbladimut oqarpoq. Kalaallit qallunaallu imminnut pissusaat pillugu misissuinikuuvoq.
Taama oqarnerminut Thorkild Kjærgaardimit taperserneqarpoq, taanna Ilisimatusarnermi oqaluttuarisaanermi lektoriuvoq.
- Nammineersinnaanermik Danmarkimut takutitsiniarneruvoq, Kalaallit Nunaanni innuttaasunut politikkiminullu sapinngisaqarnermik takutitsiniarnerulluni, Thorkild Kjærgaard oqarpoq.
Aleqa Hammond: Aaku suliassai
Sinniisoqarfimmi pisortaq Inuuteq Holm Olsen januarip aallaqqaataani 2014-mi sulinini aallartippaa. Sinniisoqarfimmi pisortap suliassaraa soorlu ilaatigut suliffimmik nutaamik ineriartortitsinissaq USA-mik nalinginnaasumik naalakkersuinikkut attaveqaatinik ataavartitsinissaq patajaallisaanissarlu siunertaralugu, Kalaallit Nunaata USA-llu akornanni niuernikkut aningaasaqarnikkullu attuumassutilinnik patajaallisaanissaq kiisalu aatsitassarsiornikkut, suliffissuaqarnikkut, ilinniartitaanikkut, ilisimatusarnikkut, kulturikkut, nunat inoqqaavisa il.il. akornanni suleqatigiinnernik patajaallisaanissaq. Sinniisoqarfimmi pisortap aamma Canada-mut assingusumik aallartitatut akuerineqarnissaa siunertarineqarpoq, taamaalilluni sulianut Canada-mut tunngasunut aallartitatut suliassat isumagilersinnaalissallugit. Sinniisoqarfiup Namminersorlutik Oqartussani naalakkersuisoqarfiit tamaasa sullittassavai.