Urani
Lektori: Kalaallit Nunaata urania Danmarkip nakkutiginiarpaa
Uranimik piiaanissaq avammullu tuniniaanissaq kalaallit kisimik oqartussaaffiginngilaat, Lars Hovbakke Sørensen erseqqissaavoq
– Kalaallit namminneq nunanut allanut politikkiminnik aalajangersaasinnaanngillat. Tamatumani Danmarki aalajangiisuusumik oqaasissaqarpoq.
Taama ersaritsigisumik oqarpoq Lars Hovbakke Sørensen, taannalu Københavns Universitetimi lektoriuvoq avataaneersoq, naalagaaffeqatigiinnermillu immikkut ilisimasaliulluni.
Taamatut oqarneranut tunngaviuvoq naalakkersuisut Venstret marlunngormat nalunaarmata inatsisissatut siunnersuusiussamaarlutik, tassuuna qulakkeerneqassalluni urani kunngeqarfiup iluani piiarneqartoq ´unioqqutitsilluni sakkussiornernut imaluunniit qaartartorsuit atorlugit ajortumeeriniarnermi´ atorneqannginnissaat.
Tamanna peqatigalugu oqaatigaa naalakkersuisut kalaallinut tunngasunut inatsisissatut siunnersuutaat asuliinnaassasoq, tassa inatsisini tunngaviusuni aammalu namminersornermut inatsimmi ersarissumik allassimareermat Kalaallit Nunaat nunanut allanut politikkimut tunngasuni nammineq aalajangiisinnaanngitsoq.
– Minnerpaannguamilluunniit nalorninartoqaraangat sammisaq nunanut allanut politikkimut tunnganersoq, Danmarki akuleruttassaaq. Uranimullu tunngatillugu oqartariaqarpoq taamaattoqarluinnartoq, lektori oqarpoq.
Lars Hovbakke Sørensen naliliivoq pineqartoq inatsisissatut siunnersuut, tassuuna qulakkeerneqassalluni Kalaallit Nunaat nammineerluni iliuuseqassanngitsoq, Danmarkip nunani tamalaani pisussaaffimminik naammassinninnissaanik ajornakusoortitsilersumik.
– Pinngitsooranimi takussutissaavoq Danmarkip Kalaallit Nunaanni pisoqarnera tamakkiisumik aqukkusukkaa, taamaasilluni naalagaaffiit allat Kalaallit Nunaannik isumaqatigiissuteqassanngimmata, Danmarkimik ajornartorsiulersitsisumik.
– Kalaallit iliuuseqarpata naalagaaffeqatigiit nunani tamalaani pisussaaffiinik unioqqutitsisumik, tamanna Danmarkip akisussaaffigissavaa, taanna oqarpoq.
Marlunngormat inatsisissatut siunnersuuteqassamaarneq saqqummiunneqarpoq 2013-imi oqallinnerup kingorna, taamanikkut kalaallit inatsisartuisa nunatta ataani uranimik piiaanissamut akuersaanngilluinnarneq atorunnaarsimmassuk.
Atorunnaarsitsineq nalornisitsilerpoq Kalaallit Nunaat uranimik piiaanissamut avammullu tuniniaanissamut qanoq annertutigisumik nammineq aalajangiisinnaanersoq.