qinersineq
Lektori: Danskit Kalaallit Nunaat pimoorunneruttariaqarpaat
Oqaluttuarisaaneq pissutigalugu danskit kalaallinut tatiginninnerat annikippoq, Aarhus Universitetimi lektori atuakkiortorlu Michael Böss oqarpoq
Sermtsiaq.AG-mit allaaserineqartareerpoq JyllandsPostenip Inatsisartunut qinersisoqarnissaanut atatillugu inunnik isumasiuititsinerat. Danskit kalaallit aallaffissornikkut pitsanngoriarnissaat ilimaginngilaat, aamma danskit kalaallinut ikiuerusunngitsut isumasiuititsinerup takutippaa.
Kalaallit politikkeriisa Kalaallit Nunaata ilorraap tungaanut saatissinnaaneraat danskit affaasa qularutigaat. Kalaallit nammineerlutik siuariartorsinnaanissaat danskit sisamararterutaannaasa upperaat.
Oqaluttuarisaaneq
Aarhus Universitetimi lektoriusoq, atuakkiortoq kiisalu Issittumi polikkimi ilisimatooq Michael Böss isumaqarpoq, Danmarkit kalaallinut tatiginninnera annikitsuusoq.
- Oqaluttuarisaaneq takussagaanni Danmarki Kalaallit Nunaannut assigiimmik pisussaaffeqanngilaq. Naalakkersuisut siulittaasorilersimasaat Aleqa Hammond danskinut isorinnittumik oqaluttarpoq. Danskilli kalaallinut ikiuisinnaannginnerat utoqqatsissutissaanngilaq, DR-imut oqarpoq.
Aamma oqaluttuarisaaneq takussagaanni danskit politikkerii kalaallinut tunuarsimaartarput.
- Kalaallit Nunaat Danmarkimut nunasiaataanikuunera pissutaavoq. Danskit politikkerii Kalaallit Nunaat pillugu oqaaseqassagaangata nunasiaateqarniartuusutut pasitinneqannginnissaq pillugu danskit oqaaseqarumavallaarneq ajorput. Tamanna ingerlariaqqiffiginikuusimasussaagaluarpoq, taamaattoqanngilarli, Michael Böss DR-imut oqarpoq.