Siulittaasortaalersut
Leif Fontaine siulittaasutut tunuarpoq
Ukiunik 60-nngortorsiortoq KNAPK ataatsimeersuarnermini nutaamik siulittaasortaassaaq
Leif Fontaine nammineq kissaateqarnermigut siulittaasutut qinigassanngorteqqinnianngilaq aalisartut piniartullu kattuffianni KNAPK-mi. Kattuffik Nuummi ataatsimeersuarpoq pingasunngornermilu ukiunik 60-nngortorsiornissaminut piareerluni.
KNAPKp siulittaasortaassaa oqalugiartuussaaq ukiunik 60-nngortorsiornermi. Aallartitat 34-it sineriammiit tikipput ataatsimeersuarnermi kulturip illorsuani Katuami pisumi peqataajartorlutik.
KNAPKp nalliuttorsiornera pingasunngornermi arlalitsigut malunnartinniarneqassaaq. Ullaakkut katersortarfimmi kaffisoqatigiittoqassaaq. Hans Egedep oqaluffiani qinoqatigiinneqareerpat oqaluffiup silataani eqqaassutissami kranseliisoqassaaq.
Unnukkut Katuami nerersuaqatigiittoqassaaq tassanilu kattuffiup siulittaasortaava oqalugiartuussaaq.