pisuussutit
Lego-mik piginnittoq nunarsuarmi pisuunerpaani nr 35-inngorpoq
Kjeld Kirk Kristiansen legop piginnittaanit inuit 34-iinnaat pisuujunerupput. Anigaasaateqarnerpaajuvorli Microsoftimik pilersitsisimasoq Bill Gates.
146 milliardi koruunit. Legomik piginnittup aningaasaatai taama naatsorsorneqarsimapput.
2017-mi Forbesip nalunaarsortagaani Kjeld Kirk Kristianseni nunarsuarmi anigaasaateqarnerpaani 35-tut inissisimavoq. Nalunaarsuisimanerallu tamanut saqqummiunneqaqqammerpoq.
Kjeld Kirk Kristiansenip ukiup siulianut aningaasaatai 90-niik 146 milliardi koruuninut amerleriarsimapput, taamaasillunilu allattorsimaffimmi 30-nik qummut nikeriarluni. 2015-mimi legop piginnittaa milliardeerit peqatigiiffianni taaneqartartumi 129-usimavoq.
Kalaallit Nunaat nuannaraa
Kjeld Kirk Kristiansen Ilulissanut tikeraarnikuuvoq Hotel Arctic-miinninilu nuannarisimaqalugu.
- Nuliaralu Kalaallit Nunaat tikeraaratsigut misigisaq uannut immikkuullarissimavoq. Nunarsuarmi angalasarnikooqaagut kisianni taama ittumik allamik misigisaqarsimanata. Sermermiut – Diskobugtilu tamaat – nuannernerpaat qulit akornanni qaffasinnerpaanut ilaavoq, milliarderi taamani AG-mut oqarpoq.
Kjeld Kirk Kristiansenip tikeraarnermini "Kammagiitta – fri for mobberi” peqataaffigaa. Tassanilu atuarfimmut meeqqerivimmullu pulaarnermi legoklodsinik agguaassilluni.
Kalaallit Nunaannut atassuteqaat Legop nioqqutissiaani immikkoortuni takuneqarsinnaapput. Legommi Duplo-imminnut atasut qimusseq, qajaq kalaallisoortullu pisiarineqarsinnaapput.
Allattorsimaffimmi danskit arfiniliupput
Allattorsimaffimmi Kjeld Kirk Kristiansenip nunaqqatini tallimat ilagivai ilaatigut Jyskimeersoq Lars Larseni. Islandimiut aamma allattorsimaffimmi ataatsimik peqataatitaqarput, Thor Bjorgolfssoni.