Tragedie
Le Mans: Qallunaaq sukkaniuttartoq ajunaartoq
Akunnerni 24-ni sukkaniunneq alianartumik nalaanneqarpoq, qallunaq Allan Simonsen ajutoornermi kingorna toqummat
Qallunaaq biilimik sukkaniuttartoq Allan Simonsen ukioq manna Le Mans-imi sukkaniunnermi siusissukkut ajutoorujussuarnerminit aqqunartiterninerminik toqquteqarpoq.
Akunnerit 24-t sukkaniulluni aallartinnerata kinguninngua ajutoorpoq, biilia ajutoornermi peqataalluni.
Simonsen nakorsanit takuniarneqarami ilismajunnaaqqasimavoq. Ajutoornerup kinguninngua qallunaaq napparsimmaviliaanneqarpoq, tassanilu aqqunartiternini toqqutigai.
Allan Simonsen biilinik sukkaniunnermik misilittagaqarluartuuvoq, ukioq mannalu Le Mansimi arfineq-aappassaa peqataavoq.
Allan Simonsen holdimi Aston Martin-imi qallunaaginnarnik inuttaqartumi ilaavoq amatørillu klassianni LM GTE Am-imi unammeqataalluni.
Aallartarfimmi holdeqataasa Christoffer Nygaardip aamma Kristian Poulsenip aallartinnerup kingorna minutsit arfineq-pingasut qaangiuttut pisoq tv-kut malinnaaffigaat, ilisimanagu Allan Simonsen qanoq annertutigisumik aqqunartitersimanersoq.
Ajutoorneq pissutigalugu Le Mansimi peqataasut kigaallapput safetycar avalatsinneqarmat, Allan Simonsenip ajutoorfiata isumannarneqarnissaata tungaanut.
Allan Simonsen 34-nik ukioqarpoq Odensemeersuullunilu. Le Mansimik aaqqissuussisut nalunaarput qallunaap ilaqutai toquneranik nalunaarfigineqarsimasut. Sukkaniulluni unammineq pilersaarutigineqartutut nanginneqarpoq Nalunaaqutaq 18.30 - tassa sukkaniunnerup aallartinneranit akunnerit sisamaata affaa ingerlareersoq - Tom Kristensenip biilia Audi normu 3-tut inissisimavoq. Qallunaat unammeqatigiit Audi-mit unammillertiminnit minutsimik ataatsimik kinguarsimapput.
Tom Kristensen, unamminermi tassani qulingiluassaa ajugaaniartoq, suli biilimik ingerlatsinngilaq. Holdeqataa Skotlandimeersoq Allan McNish qallunaap biilianik siulliulluni aallarpoq, maannalu franskeq Loic Duval Audi-mik ingerlatsisoq normu 2-tut inissisimavoq.