Opdrift
Lars Møller suli angusaqarnerorusuppoq
Lars Møllerip Nuummiup aqqutissani nassaarisimavaa - ukiut marluk matuma siornatigut Sorø Gymnastikefterskolimi atualerpoq, tamatumalu kingorna efterskolit Danmarkimi pissartanngorniunneranni bronze-nassimalluni
"Haluu Sermitsiaq.
Kalaaliuvunga Danmarkimi najugalik, ukiunilu marlunni eqaarsaarneq aallussimavara".
Taamatut Sermitsiaq.AG-p facebookimi qupperneranut imminut ilisaritippoq Lars Møller Kristiansen.
Taanna 17-inik ukioqarpoq naatsumillu oqaluttuarluni Nuummi inunngorsimalluni, ukiulli marluk matuma siornatigut Danmarkimut efterskoleriarsimalluni. Ukiut marluk ingerlanerinnaanni naammaginaannartumik eqaarsaartartooriarluni eqaarsaallammanngorsimavoq 2013-milu Efterskolit Danmarkimi pissartanngorniunneranni bronze-nassimalluni.
– Siunissamut pilersaarutigaara gymasiami atuareernerma kingorna efterskolimi ilinniartitsisunngorniarnissara, taamaasillunga eqaarsaarnermik silaannakkullu uleqattaarnermik ilinniartitsisalissallunga, Lars Møller Kristiansen Sermitsiaq.AG-mut oqarpoq.
Lars Møller Kristiansen maanna Oure Kostgymnasium-imi atuarpoq, aaqqissuisoqarfimmullu videomik nassiussivoq nukittussusianik, eqaassusianik qunusuissusianillu takutitsisumik. Taanna sitemi uani takusinnaavat.